Qazaqstannyń syrtqy saıasaty úshin jyl jaqsy bastaldy - Dosym Sátpaev
ALMATY. QazAqparat - Qazaqstandyq saıasattanýshy Dosym Sátpaev Sırııadaǵy qaqtyǵystar boıynsha 23-24 qańtar kúnderi Astanada ótken kelissózderge qatysty túıin jasap, pikir bildirdi, dep habarlaıdy QazAqparat tilshisi.
«Astanada Sırııadaǵy qaqtyǵystardy retteý boıynsha kelissózder ótti. Syrtqy saıasat turǵysynan qaraǵanda Qazaqstan úshin jyl jaqsy bastalyp otyr. Óıtkeni, bul (kelissóz - avt.) elimizdiń syrtqy saıasatyna paıda ákeledi. Qazaqstannyń postkeńestik keńistiktegi aıtarlyqtaı mańyzdy oıynshy retindegi deńgeıin kóterip, túrli máselelerdi retteýde araǵaıyn retindegi eldiń ımıdjin nyǵaıtýy múmkin. Bizdiń elimiz bul salada ózin jaqsy jaǵynan kórsetip otyrǵany birinshi ret emes», - dedi Dosym Sátpaev.
Sonymen qatar, saıasattanýshy Qazaqstan ózin kez kelgen qaqtyǵysty jaǵdaılardy rettteýde postkeńestik keńistikte basty moderator retinde kórsetýge tyrysyp otyrǵanyn aıtty.
Onyń aıtýynsha, Qazaqstannyń syrtqy saıasaty osy eldiń memleket basshysymen baılanysty.
«Elimizdiń syrtqy saıasatyn formaldi túrde Syrtqy ister mınıstrligi júrgizedi, al negizinen ony júzege asyratyn memleket basshysy. Prezıdenttiń Qazaqstan álemdik qatynastar júıesinde qaı orynda bolýy kerektigi, respýblıka qandaı saıasatty júrgizýi qajettigi týraly jeke túsinigi bizdiń ashyq syrtqy saıasatymyzda aıqyn kórinedi. Bul kóptegen seriktesterdiń kóńilinen shyǵady», - dedi ol.
Dosym Sátpaev bul jaǵynan Qazaqstan belsendi syrtqy saıasatymen postkeńestik keńistikte aıqyn erekshelengenin aıtty.
«Respýblıkamyz kóptegen halyqaralyq uıymdarǵa qatysyp, túrli deńgeıdegi aımaqtyq iri qurylymdardyń barlyǵyna kirdi. Sonymen qatar, Qazaqstan árqashan jahandyq, aımaqtyq saıasat salasynda ártúrli ıdeıalaryn usynyp keledi. Qazaqstan ıadroǵa qarsy aımaq qurý ıdeıasyn usyndy. Ár taqyryptaǵy qaıshylyqty máselelerdi retteýde usynystar berý jaǵynan bizdiń elimizdiń úlken tájirıbesi bar», - dedi saıasatker.
