«Qazaqstannyń syrtqy saıasaty qazirgi zamanǵy syn-qaterlerge jaýap beredi» - baspasózge sholý

ASTANA. 15 jeltoqsan. QazAqparat - «QazAqparat» aqparat agenttigi respýblıkalyq basylymdarda 15 jeltoqsan, juma kúni shyqqan ózekti materıaldarǵa sholýdy usynady.

 ***

Elimiz syrtqy saıasat vedomstvosynyń basshysy Erlan Ydyrysov Reseıdiń «Jańalyqtar» aqparat agenttigine bergen suhbatynda Otanymyzdyń syrtqy saıasatyndaǵy basymdyqtary týraly áńgimeleıdi. Osy suhbattyń qazaqsha aýdarmasy «Egemen Qazaqstan» gazetinde «Qazaqstannyń syrtqy saıasaty qazirgi zamanǵy syn-qaterlerge jaýap beredi» degen taqyryppen jaryq kórdi. Barlyq saýaldarǵa tushymdy jaýap bergen E.Ydyrysov: «Egemen Qazaqstan qalyptasýynyń eń bastapqy kezeńinde-aq Prezıdent Nursultan Nazarbaev basty qaǵıdatty ilgeriletken edi. Olar - Qazaqstan Respýblıkasynyń syrtqy saıasatyn ishki saıasattyń jalǵasy retinde qarastyrý, qoǵamdyq-saıası tu­raq­tylyqty syrtqy saıası, ulttyq qa­ýip­sizdik turǵysynan qamtamasyz etý, eldi odan arǵy ekonomıkalyq, áleýmettik, ıntellektýaldyq jáne mádenı damý men qalyptastyrýǵa ońtaıly jaǵdaı qurý. Osy qaǵıdatty basshylyqqa ala otyryp, biz aıtarlyqtaı nátıjelerge qol jetkizdik. Qazaqstan áleýmettik-ekonomıkalyq da­mý deńgeıi jóninen Ortalyq jáne Shyǵys Eýropa memleketterine asa jaqyn keldi. Ekonomıkany ártaraptandyrý, ony ınnovatsııalyq-tehnologııalyq jań­­ǵyrtý úderisterinde aıtarlyqtaı ilgerileýshilikter bar», - deıdi.

 

Keshe Memleket basshysy «Qazaqstan-2050»: Stra­tegııasy qalyptasqan memlekettiń jańa saıası baǵyty» atty Qazaqstan halqyna Joldaýyn jarııalaǵan bolatyn. Osyǵan oraı Qazaqstan halqy Assambleıasy el azamattaryna úndeý joldady. «Egemen Qazaqstan» gazetiniń senbilik sanynda basylǵan úndeýde: «Elbasynyń «Biz teń múmkindikter qoǵamyn, bári zań aldynda birdeı bolatyn qoǵamdy qurýdamyz» degen oıy - Qazaqstan halqynyń myzǵymas birliginiń beriktigin kórsetedi dep sanaımyz. Biz Nursultan Ábishulynyń jalpyqazaqstandyq sáı­kestikti qalyptastyrý týraly uranyn - halqymyzdyń tarıhı sanasynyń negizi men memlekettik tildi bizdiń damyp kele jatqan azamattyq qoǵamnyń uıystyrýshy negizi retinde damytý dep bilemiz jáne qoldaımyz. Biz Qazaqstan halqyn ózimizge tán - tabandylyq, ta­lap­­­­kerlik, eńbeksúıgishtik jáne maqsatkerlik sııaqty jaqsy jaq­tarymyzben tanylyp, elimiz úshin aıanbaı eńbektenýge shaqyramyz», - delingen.

***

«Bizdiń balalarymyzdyń qaharlyǵy sonshalyq tipti kúshálámen oınaıdy», - dep jazady «Ekspress K» gazeti búgingi sanynda jaryq kórgen maqalasynda. Jarııalanymda Qazaqstanda jáne TMD-nyń basqa da elderinde balalar oıynshyǵyna júrgizilgen tekserý nátıjeleri jaıynda keńinen baıandalǵan. «Qazaqstanda satylyp jatqan balalar oıynshyqtary men taýarlary tek aǵashtan, plastıkadan, masatydan jáne matadan ǵana jasalynbaǵan. Olardyń quramynda synap, qorǵasyn, kúshálá jáne súrme bar. Keıbir oıynshyqtarda qorǵasyn kólemi qaýipsizdik sheginen 100 ese asyp jyǵylady», - dep jazady basylym. Balalarǵa arnalǵan taýarlardaǵy zııandy zattardy anyqtaý úshin ótkizilgen testileý ótken jyldyń 27 qarashasynan osy jyldyń 9 jeltoqsanyna deıin Armenııada uıymdastyrylǵan. Ony Qazaqstan, Qyrǵyzstan, Reseı, Armenııa, Belarýs jáne Ýkraına elderiniń úkimettik emes uıymdary júrgizgen.

***

Almatyda elimizdiń jas qoǵam qaıratkerleri reseılik «polıttehnolog», ultshyl Aleksandr Belovtyń arandatýshylyǵyna ermeýge shaqyrdy. Bul jaıynda «Vremıa» gazetiniń búgingi sanyndaǵy «Ne verte Sashe - on pod Mýhoı!» degen taqyryptaǵy maqalada aıtylǵan.

BAQ-tyń jazýynsha, Reseıde ultaralyq arazdyqty qozdyrǵany úshin sotty bolǵan bul adam qazaq jastaryna turaqty trenıngter ótkizgen. Ol qazaq stýdentterin Qyrǵyzstanǵa oqý úshin alyp baryp, sol jaqta sherý uıymdastyrý, polıtseılerge qarsy turý syndy daǵdylardy úıretken. Atalǵan trenıngti ótkizýdi qashqyn olıgarh Muhtar Ábilázovke tıesili «STAN» vıdeoportaly qarjylandyryp kelgen.