Qazaqstannyń syrtqy saýda aınalymy 24,3 paıyzǵa ulǵaıdy

ASTANA. QazAqparat - Qazaqstannyń syrtqy saýda aınalymy 24,3 paıyzǵa ulǵaıdy. Bul týraly búgin Úkimet otyrysynda 2018 jyldyń 1 toqsanyndaǵy áleýmettik-ekonomıkalyq damý qorytyndysy jaıynda baıandaǵan QR Ulttyq ekonomıka mınıstri Tımýr Súleımenov aıtty, dep habarlaıdy QazAqparat tilshisi.

«Syrtqy saýda aınalymnyń ósýi jyldamdady. Bul ekonomıkanyń naqty salasyndaǵy iskerlik belsendiliktiń nátıjesi. Qazaqstannyń syrtqy saýda aınalymy 24,3 paıyzǵa ulǵaıdy. Eksport 27 paıyzǵa ósti. Bul rette, shıkizattyq emes taýarlar eksportynyń ósimi 11,2 paıyzdy qurady.

Import 19,4 paıyzǵa artty. Ol negizinen ımporttalǵan ınvestıtsııalyq taýarlardyń esebinen ósti. Olardyń ulǵaıýy 25,7 paıyzdy qurady», - dedi ol.

Sonymen qatar mınıstr eńbek naryǵynda turaqtylyq saqtalyp otyrǵanyn, aǵymdaǵy jyldyń basynan 134,8 myń adam jumysqa ornalastyrylǵanyn aıtty.

«Aǵymdaǵy jylǵy sáýirde jumyssyzdyq deńgeıi ózgerissiz qaldy jáne 4,9 paıyzdy qurady.

Aıtarlyqtaı uzaq merzimnen keıin, aǵymdaǵy jyldyń basynan bastap naqty eńbekaqynyń ósýi baıqalady. Ol 1,2 paıyzdy qurady. Qańtar-sáýirde ortasha aılyq eńbekaqy 152,3 myń teńge boldy», - dedi Tımýr Súleımenov.