Qazaqstannyń Syrtqy ister mınıstri Ystanbul men Dýshanbege barady
Bul týraly QR Syrtqy ister mınıstrliginiń resmı ókili Aıbek Smadııarov aıtyp berdi.
«17 qazanda Ystanbul qalasynda QR Premer-Mınıstriniń orynbasary – Syrtqy ister mınıstri Muhtar Tileýberdi Túrki memleketteri uıymyna múshe memleketterdiń Syrtqy ister mınıstrleri keńesiniń beıresmı otyrysyna qatysady. Shara barysynda bıylǵy qarasha aıynda Samarqand qalasynda josparlanǵan TMU memleketteri basshylarynyń sammıtine daıyndyq máselelerin qaraý jáne sammıt barysynda qol qoıylatyn qujattardyń jobalaryn túpkilikti kelisý kútilip otyr», - dedi resmı ókil mınıstrlikte ótken brıfıngte.
Túrki memleketteriniń uıymy Qazaqstannyń bastamasymen 2009 jyly Ázerbaıjannyń Nahchyvan qalasynda qurylǵan. TMU hatshylyǵy Ystanbul qalasynda ornalasqan.
Qazirgi ýaqytta uıymǵa Ázerbaıjan, Qazaqstan, Qyrǵyzstan, Túrkııa jáne Ózbekstan kiredi. Majarstan men Túrikmenstannyń baqylaýshy mártebesi bar.
Sonymen birge, Muhtar Tileýberdi 18-19 qazanda Dýshanbe qalasynda «Terrorızmge qarsy kúres jáne terrorısterdiń transshekaralyq qozǵalysyn boldyrmaý maqsatynda shekara qaýipsizdigi jónindegi halyqaralyq jáne óńirlik yntymaqtastyq» atty joǵary deńgeıdegi halyqaralyq konferentsııaǵa barady.
«Bul sharanyń negizgi maqsaty – shekara qaýipsizdigin qamtamasyz etý, terrorıster men terrorıstik toptardyń qozǵalysyna jol bermeý, mańyzdy máseleler boıynsha yntymaqtastyqty damytý. Eki kúndik konferentsııany Tájikstan Úkimeti, BUU-nyń Kontrterrorıstik basqarmasy (BUU KTB), BUU-nyń Ortalyq Azııa úshin preventıvtik dıplomatııasynyń óńirlik ortalyǵy, Eýropalyq odaq (EO), Eýropadaǵy qaýipsizdik jáne yntymaqtastyq uıymy (EQYU), sondaı-aq Saýd Arabııasy Koroldigi jáne Qatar Memleketi birlesip uıymdastyrady», - dedi A. Smadııarov.
Foto: press-slýjba MID RK
