Qazaqstannyń Syrtqy ister mınıstri IYU-nyń Palestına jónindegi sammıtinde sóz sóıledi
YSTANBUL. QazAqparat - Memleket basshysynyń tapsyrmasymen Qazaqstannyń Syrtqy ister mınıstri Qaırat Ábdirahmanov 2018 jylǵy 14 mamyrda Gaza sektorynda bolǵan oqıǵaǵa baılanysty Islam yntymaqtastyq uıymynyń (IYU) tóraǵasy - Túrkııa Respýblıkasynyń Prezıdenti Redjep Taıyp Erdoǵannyń bastamasymen Ystanbulda uıymdastyrylǵan IYU tótenshe sammıtine qatysty. Bul týraly QazAqparat QR Syrtqy ister mınıstrliginiń baspasóz qyzmetin silteme jasap habarlaıdy.
Qazaqstan tarapy Palestınadaǵy ahýaldyń shıelenisýine alańdaýshylyǵyn bildirip, beıbit halyqqa qarsy qarýly kúsh qoldanylýyna qarsy ekendigin jetkizdi, sondaı-aq zorlyq-zombylyqty dereý toqtatý úshin halyqaralyq qaýymdastyqty barlyq múmkin sharalardy qoldanýǵa shaqyrdy.
Sonymen qatar, syrtqy saıasat vedomstvosynyń basshysy ártúrli etnıkalyq toptar men dinı nanymdardy ustanǵan halyqtardyń ortaq úıi bolyp tabylatyn Ierýsalım qalasyndaǵy palestınalyqtar men ızraıldikter bir-biriniń ómir súrý quqyqtaryna qurmet kórsetý qajettiligin basa aıtty.
BUU Qaýipsizdik Keńesi men Bas Assambleıasynyń sheshimderi men qararlaryna qatysty óz aınymastyǵyn rastaı otyryp, Syrtqy ister mınıstri Qazaqstannyń Taıaý Shyǵystaǵy jaǵdaıdy saıası dıalog jolymen beıbit saıası protsesiniń aıasynda tolyqqandy retteý úshin dereý, dáıekti jáne jan jaqty sheshimder qabyldanýyna qoldaý kórsetetinin baıandaı kele, Izraıl men Palestına basshylyǵyn eki memlekettiń beıbitshilikte ómir súrýin qamtamasyz etýge baǵyttalǵan naqty qadamdar jasaýǵa shaqyrdy.
Ystanbuldaǵy Islam yntymaqtastyq uıymynyń tótenshe sammıtine IYU-nyń 40-tan astam múshe elderinen memleket, úkimet, parlament basshylary men syrtqy ister mınıstrleri qatysty.
Sammıt nátıjesinde kommıýnıke qabyldandy. Qujatta IYU elderiniń ókilderi Palestına halqyna tolyq jáne janjaqty qoldaý bildirdi.
Sammıttiń aıasynda Q. Ábdirahmanovtyń BUU Bas hatshysynyń saıası máseleleri boıynsha kómekshisi Mıroslav Enchamen kezdesýi ótti.
Suhbattasýshylar Birikken Ulttar Uıymynyń sheńberinde, onyń ishinde Qazaqstannyń BUU Qaýipsizdik Keńesindegi músheligi turǵysynda ózara is-qımyldyń ózekti máselelerin talqylady.
