Qazaqstannyń syrtqy barlaýshylary birshama erkin jumys isteıtin bolady - Senat

ASTANA. QazAqparat - Búgin Senattyń Halyqaralyq qatynastar, qorǵanys jáne qaýipsizdik komıtetiniń keńeıtilgen otyrysy bolyp ótti. Onda «Qazaqstan Respýblıkasynyń keıbir zańnamalyq aktilerine syrtqy barlaý máseleleri boıynsha ózgerister men tolyqtyrýlar engizý týraly» Zań jobasy talqylandy.

Zań jobasynda syrtqy barlaýdyń jáne arnaýly memlekettik organdardyń sýbektileri úshin basqa memlekettik organdar men uıymdardyń qujattaryn daıyndap, rásimdeý quqyǵyn ulttyq qaýipsizdik organdaryna bekitý normalary qarastyrylady. Budan bólek, QR Qorǵanys mınıstrliginiń áskerı barlaý organdary jáne QR Ulttyq qaýipsizdik organdary syrtqy barlaýdyń sýbektileri retinde aıqyndalatyn bolady. Sonymen qatar, syrtqy barlaý salasyndaǵy ýákiletti organnyń quzyreti naqtylanady.

Barlaý organdarynyń qyzmetkerleri men áskerı qyzmetshileriniń jeke basyn jedel búrkemeleý maqsatynda basqa memlekettik organdar men uıymdardyń qujattaryn daıyndaý, ony rásimdeý quqyǵy ulttyq qaýipsizdik organdaryna bekitiledi. Jedel izdestirý qyzmetiniń sýbektileriniń arnaıy jedel izdestirý is-sharalaryn tehnıkalyq júzege asyrýdaǵy ókilettikteri shekteledi. Jalpy, zań jobasy qazaqstandyq barlaýshylarǵa áldeqaıda erkin jumys isteýge múmkindik beredi. Sonyń ishinde «Syrbar» qyzmeti memlekettik organdarmen, onyń ishinde mınıstrliktermen ashyq ári naqty jumys isteýge múmkindik alady.

Talqylaýdan soń senatorlar zań jobasyn palatanyń qaraýyna shyǵarý týraly sheshim qabyldady.