Qazaqstannyń Syrdarııadan alatyn úlesi qandaı
Qazaqstan Syrdarııa ózeni arqyly jyl saıyn keminde 10 tekshe shaqyrym sý alyp otyrýy kerek.
Al sý mol jyldary bul meje 12 tekshe shaqyrymnan az bolmaýy tıis. Sonaý keńes zamanynda bekitilgen qujattarda bul shart anyq jazylǵan.
Ekologııa, geologııa jáne tabıǵı resrýstar mınıstrligi redaktsııa joldaǵan saýalǵa osyndaı jaýap berdi.
«Keńestik Sotsıalıstik Respýblıkalar Odaǵynyń memlekettik josparlaý komıteti memlekettik saraptaý komıssııasynyń 1982 jylǵy 5 mamyrdaǵy №11 qaýlysymen bektilgen «Memlekettik saraptaý komıssııasynyń saraptamalyq qorytyndysy» jáne KSRO Melıoratsııa jáne sý sharýashylyǵy mınıstrligi ǵylymı-tehnıkalyq keńesi otyrysynyń 1984 jylǵy 29 aqpandaǵy № 413 hattamasymen bekitilgen «Syrdarııa ózeniniń basseınindegi sý resýrstaryn keshendi paıdalaný men qorǵaýdyń naqtylanǵan shemasyna» sáıkes Syrdarııa ózeninen Qazaqstannyń úlesi - ortasha kópjyldyq mólsherde 12 km3, al sý az jyldary - 10 km3 dep belgilengen» dep jazylǵan jaýapta.
Mınıstrlik mamandarynyń aıtýynsha, atalmysh qujattarda Sharadara sý qoımasyna deıingi tustarda Syrdarııa basseıninen Qazaqstanǵa kiretin sýdyń kólemi de naqtylanǵan eken.
«Sonymen qatar, Shardara sý qoımasyna deıin Syrdarııa ózeninen Farhad sý torabynan Dostyq memleketaralyq kanaly boıynsha - 1,11 km3, al Shyrshyq ózeni, Úlken Keles magıstraldyq kanaly, Zah, Hanym, Bozsý memleketaralyq kanaldary boıynsha-1,07 km3 úlesimiz bar» delingen vıtse-mınıstr Serik Qojanııazovtyń jaýabynda.
