Qazaqstannyń sybaılas jemqorlyqty qabyldaý ındeksinde reıtıngi qandaı

ASTANA. QazAqparat - Qazaqstan sybaılas jemqorlyqty qabyldaý ındeksi reıtınginde Ortalyq Azııa elderi ishinde kósh bastady. Bul týraly QR Memlekettik qyzmet isteri jáne sybaılas jemqorlyqqa qarsy is-qımyl agenttigi Sybaılas jemqorlyqqa qarsy saıasat departamentiniń dırektory Danııar Sabyrbaev aıtty.

«Transparency International sybaılas jemqorlyq deńgeıin zertteý boıynsha úkimettik emes halyqaralyq uıym 2018 jylǵy sybaılas jemqorlyqty qabyldaý ındeksin (SJQI) jarııalady. 2018 jylǵy SJQI 180 eldiń memlekettik sektoryndaǵy sybaılas jemqorlyqty ólsheýge baǵyttalǵan 13 zertteýler men sarapshylardyń baǵalaryna negizdeledi. Bul rette ındekste 0-den 100-ge deıingi shkala qoldanylady, onda 0 - bul sybaılas jemqorlyqtyń óte joǵary deńgeıi, al 100-kerisinshe, óte tómen deńgeıi. SJQI reıtınginde elderdiń jalpy tómendeýi aıasynda Qazaqstan 31 upaı jınap, 124 orynǵa ıe boldy», - dedi ol.

Onyń aıtýynsha, Qazaqstan 9 zertteýde baǵalandy. Bul rette bes reıtıng agenttikteriniń sarapshylary Qazaqstannyń sybaılas jemqorlyqqa qarsy kúres jónindegi kúsh-jigerin oń baǵalady.

Úsh reıtıngtik agenttik qabyldanǵan sybaılas jemqorlyqqa qarsy sharalarǵa baǵa berdi, taǵy ekeýi ony jetkiliksiz dep sanady.

Bertelsmann Foundation Transformation Index, Economist Intelligence Unit Country Ratings, Freedom House Nations in Transit Ratings jáne Global Insight Country Risk Ratings reıtıngisin 2017 jylǵy deńgeıde qaldyrdy - 25 ball, 20 ball, 24 ball jáne 35 ball sáıkesinshe. World Justice Project Rule of Law Index reıtıngi da burynǵy deńgeıde qaldy - 34 ball.

IMD World Competitiveness Yearbook reıtıngti 55-ten 48 balǵa deıin tómendetti. PRS International Country Risk Guide ótken jylǵy 24 balmen salystyrǵanda 27 balǵa deıin, World Economic Forum - 2017 jylǵy 36-ǵa qarsy 46 ball, al Varities of Democracy Project-24-ten 17 ballǵa deıin azaıtty.