Qazaqstannyń sybaılas jemqorlyqqa qarsy zańnamasy úzdik dep tanyldy - N.Nazarbaev
ASTANA. 28 qańtar. QazAqparat /Rýslan Ǵabbasov/ - Qazaqstannyń sybaılas jemqorlyqqa qarsy zańnamasy úzdik dep tanyldy. Bul týraly búgin Parlament palatalarynyń birlesken otyrysynda Qazaqstan halqyna arnaǵan Joldaýynda Memleket basshysy Nursultan Nazarbaev aıtty.
«Sybaılas jemqorlyqqa qarsy ymyrasyz kúres júrgizilýde. Qazirgi ýaqytta halyqaralyq sarapshylardyń baǵalaýynsha, Qazaqstannyń sybaılas jemqorlyqqa qarsy zańnamasy eń tıimdi zańnamalardyń biri dep tanyldy», - dep atap ótti Memleket basshysy.
Osy oraıda Elbasy sońǵy eki jyldyń ishinde qyryqtan astam respýblıkalyq deńgeıdegi basshylar, oblystyq jáne qalalyq aýqymdaǵy 250-den astam laýazymdy adamdar, onyń ishinde, 39 ákim men olardyń orynbasarlary qylmystyq jaýaptylyqqa tartylǵanyn aıtyp ótti.
«Úsh jyldyń ishinde elimiz álemdik sybaılas jemqorlyqqa qarsy reıtıngte óziniń kórsetkishterin birden 45 tarmaqqa jaqsartty. Osy ındeks boıynsha biz barlyq TMD elderi aıasynda úzdik oryndamyz. Bul jumystar budan ári de jalǵasatyn bolady», - dep túıindedi N.Nazarbaev.
