Qazaqstannyń Sút odaǵy BAQ arasynda «Aqnıet sút» baıqaýyn jarııalady
ALMATY. Aqpannyń 24-i. QazAqparat /Erbol Azanbek/ - Búgin Almatyda Qazaqstannyń Sút odaǵy buqaralyq aqparat quraldary men jýrnalıster arasynda respýblıkalyq «Aqnıet sút» baıqaýy bastalǵanyn jarııalady,
dep habarlaıdy QazAqparat.
Sút odaǵynyń atqarýshy dırektorynyń orynbasary Lıdııa Mıheevanyń aıtýynsha, baıqaý qoǵamdy, buqaralyq aqparat quraldaryn jáne memleketti sút salasynyń bolashaǵy men jaǵdaıy, sút óńdeý tehnologııalarynyń damýy, sútti nasıhattaý máselelerine nazar aýdartý maqsatynda uıymdastyrylady. «Sút óndirý, óńdeý salasy boıynsha Qazaqstannyń óz naryǵyn qamtamasyz etýge múmkindigi tolyq jetedi. Alaıda súttiń basym bóligi Reseı men Belarýstan keledi. 2007 jyldan beri ımport kólemi qatty qarqynmen artýda.Sonymen qatar, elimizde sútti tutyný mólsheri de tómen. Bizde damyǵan elderge qaraǵanda sút az mólsherde tutynylady. Osy baǵytta sútti nasıhattaý qajet» deıdi ol.
Sút odaǵy uıymdastyratyn baıqaý 24 aqpan men 19 qarasha aralyǵynda 3 kezeń boıynsha ótedi. BAQ ókilderiniń jumystary «úzdik qazaq tilindegi maqala», «úzdik orys tilindegi maqala» jáne «úzdik telesıýjet» atalymdary boıynsha saralanady. Eń úzdik jumystardy ádilqazylar anyqtaıdy. Baıqaý talaby boıynsha qatysýshylardyń jumystary BAQ-ta jaryq kórýi tıis.
