Qazaqstannyń sýmen jabdyqtaý jobalaryna 1,3 trln teńge zaım qajet

ASTANA. QazAqparat - Qazaqstanǵa eldi mekenderdi aýyz sýmen qamtamasyz etý jobalaryn júzege asyrý úshin 1,3 trln teńge kóleminde syrtqy qaryz qajet. Bul týraly búgin QR Parlamenti Májilisinde ótken parlamenttik tyńdaýda Azııa damý banki Qazaqstandaǵy turaqty ókildiginiń dırektory Djovannı Kapannellı aıtty, dep habarlaıdy QazAqparat.

«Taıaýda biz Úkimetpen aýyldy eldi mekenderdi aýyz sýmen qamtamasyz etý jónindegi jańa jobalardy iske qosý múmkinshiligin talqyladyq. Atalǵan jobanyń aıasynda aýyldyq eldi mekenderdi sýmen jabdyqtaýdyń aǵymdaǵy kólemi 4 eseden astamǵa ulǵaıady dep kútilýde. Bizge qajet etiletin ınvestıtsııanyń jalpy kólemi shamamen 1,3 trln teńge ekendigi aıtyldy. ADB Qazaqstannyń bıýdjetten tys qarjy kózin izdeý qajettiligin eskere otyryp, atalǵan jobaǵa qoldaý kórsetý máselesin qarastyrýǵa daıyn», - dedi ol.

Onyń aıtýynsha, ADB barynsha tartymdy sharttarmen táýelsiz qaryz aıasynda jeńildikpen qarajat usyna alatyndyǵyn málim etken.

«Investıtsııa aýqymy men tarıfterdiń artýyna yqpalyn nazarǵa ala otyryp, biz el basshylyǵyna barynsha tómen shyǵyndamen jáne uzaqmerzimdi tıimdilikpen qarjylandyrý nusqasyn qaraýdy usynamyz», - dedi ol.

Djovannı Kapannellıdiń aıtýynsha, ADB Qazaqstannyń sý resýrstaryn basqarý júıesin jetildirý salasyndaǵy jumystarǵa tartylǵan. 2006 jyly «Aýyz sý» memlekettik baǵdarlamasyn júzege asyrýǵa 5,3 mlrd teńge zaım bólgen. Atalǵan qarajat Ońtústik Qazaqstan, Soltústik Qazaqstan jáne Aqmola oblystarynyń aýyldyq eldimekenderin sýmen qamtamasyz etý jumystaryna jumsalǵan.

Aıta keteıik, QR Parlamenti Májilisinde elimizdiń eldi mekenderin sapaly aýyz sýmen qamtamasyz etýdiń ózekti máselelerine arnalǵan parlamenttik tyńdaý ótti. Sharaǵa Májilis Tóraǵasy Nurlan Nyǵmatýlın, QR Premer-Mınıstriniń orynbasary - Aýyl sharýashylyǵy mınıstri Asqar Myrzahmetov, Qarjy mınıstri Baqyt Sultanov, Investıtsııalar jáne damý mınısti Jeńis Qasymbek, múddeli memlekettik organdardyń, ǵylymı-zertteý ınstıtýttarynyń ókilderi qatysty.