Qazaqstannyń sýly-batpaqty jerlerin saqtaý jónindegi aýqymdy joba aıaqtaldy
TANA. 5 tamyz. QazAqparat /Marlan Jıembaı/ - 7 jylǵa sozylǵan Qazaqstannyń sýly-batpaqty jerlerin saqtaý jónindegi aýqymdy joba aıaqtaldy. Joba BUU Damý baǵdarlamasy men QR Úkimetiniń birlesýi náttıjesinde Ǵalamdyq ekologııalyq qormen júzege asyryldy.
Osyǵan oraı búgin elordada alqaly jıyn ótip, onda BUU Damý baǵdarlamasynyń Qazaqstandaǵy Turaqty ókili Stıven Týll sharanyń Ortalyq Azııadaǵy eń tıimdi ekologııalyq ári gýmanıtarlyq jobalardyń birine aınalǵandyǵyn atap ótti. Onyń jalpy bıýdjeti 32 mln. dollardy quraıdy.
«2004 jyldan bastap Qazaqstannyń sýly-batpaqty jerlerin saqtaý problemalary halyqaralyq mártebe alǵan bolatyn. Osy ýaqyt aralyǵynda Teńiz-Qorǵaljyn, Alakól-Sasyqkól kólder júıelerinde jáne Jaıyq ózeniniń atyrabynda ornalasqan aýyldardyń áleýmettik-ekonomıkalyq jaǵdaıy aıtarlyqtaı jaqsardy. Alakól jáne Sasyqkól qoryqtarynyń aýmaqtary keńeıtildi. «Aqjaıyq» memlekettik tabıǵı rezervaty quryldy, aýyldarda balamaly qyzmet engizý negizderi jasalyp, úsh jobalyq aýmaq mektepterine ekologııalyq bilim berý baǵdarlamalary engizildi», - dedi ol.
Fermerlik sharýashylyqtarda ornyqty aýyl sharýashylyǵy ádisterin engizý maqsatynda elektrmen qamtamasyz etýge arnalǵan kún batareıalary ornatylyp, mal sharýashylyǵyn damytý úshin jem-shóp bazalary quryldy.
Jobanyń yqpal etýi arqasynda qazirgi ýaqytta Qazaqstannyń jalpy alańy 1 626 768 gektar bolatyn jeti nysanyna sýly-batpaqty jer mártebesi berildi.
