Qazaqstannyń strategııalyq zertteýler ınstıtýty 25 jyldyǵyn atap ótýde
«Qazaqstannyń strategııalyq zertteýler ınstıtýty - Prezıdent Ákimshiliginiń eń basty zertteý ortalyǵynyń biri. Osy jerde jasalǵan saraptamalar men usynystar elimizde qabyldanǵan kóptegen strategııalyq sheshimderdiń negizi bolyp tabylady. Bir sózben aıtqanda, Qazaqstannyń Táýelsizdik shejiresinde ınstıtýttyń aıqyn qoltańbasy bar. Instıtýt jetekshileriniń deni, qyzmetkerlerdiń kópshiligi - Prezıdent Ákimshiliginde eńbek etken azamattar. Elbasy Nursultan Nazarbaevtyń ózi ınstıtýttyń damýyna nazar aýdaryp, jumysyn únemi qadaǵalap otyrady», - dedi QR Prezıdenti Ákimshiliginiń saıasat bóliminiń meńgerýshisi Aıda Balaeva ınstıtýttyń 25 jyldyǵyna arnalǵan xalyqaralyq konferentsııada. Bólim basshysy Prezıdenttiń quttyqtaýyn da jetkizdi.
«Qazaqstannyń strategııalyq zertteýler ınstıtýty shırek ǵasyrdy arqa tastap, elimizdiń bedeldi ǵylymı-saraptamalyq uıymyna aınaldy. Jetekshi xalyqaralyq sarapshylar ortasynda moıyndaldy. Qazaqstannyń barlyq strategııalyq jáne baǵdarlamalyq qujattaryn ǵylymı turǵyda saraptaýda Qazaqstannyń staretııalyq zertteýler ınstıtýty ujymynyń úlesin erekshe atap ótken jón», - delingen Memleket basshysynyń quttyqtaý xatynda.
Instıtýtty ár jyldary Ómirserik Qasenov, Lev Tarakov, Alma Sultanǵalıeva, Ermuxamet Ertisbaev, Máýlen Áshimbaev, Bolat Sultanov jáne Erlan Karınder basqardy. Qazirgi jetekshisi - Zarema Shaýkenova. «Qazaqstannyń strategııalyq zertteýler ınstıtýtynyń alǵashqy basshysy Ómirserik Qasenov ınstıtýttyń qurylýyna úlken úles qosty. Ókinishke qaraı, ol ómirden erte ketti. Degenmen, biz onyń barlyq eńbekterin arnaıy jınaqqa engizdik. Búgin alǵash ret ınstıtýttyń barlyq dırektorlary bas qosyp otyr», - dep atap kórsetti Z.Shaýkenova.
«Nur Otan» partııasy tóraǵasynyń birinshi orynbary Máýlen Áshimbaev ta ınstıtýtta eńbek etken jyldaryn eske alyp, atalǵan uıymnyń elimizdiń saıası ómirindegi ornyn erekshe atap ótti. «Shynymen de, 25 jyldyń ishinde ınstıtýttyń zertteýleri men keńesteri negizinde kóptegen strategııalyq mańyzy bar sheshimder qabyldandy. Bul jerden tamasha sarapshylar, ǵalymdar men memlekettik qyzmetshiler shyqty. Men ózim ınstıtýtta ótkizgen bes jylymdy jyly eske alyp otyramyn. Biraz qyzyqty ári jaýapty jumystar atqaryldy. Dástúr sabaqtastyǵy da saqtaldy. Júıeli jumys, ashyqtyq, naqtylyq pen patrıotızm sııaqty dástúrli qundylyqtar áli de uzaq jyldar saqtalyp, ulttyq múddemizdi qorǵaýǵa negiz bola beredi dep senemin. Qazirgi kezde el ekonomıkasynda, saıası-ekonomıkalyq ómirde aýqymdy reformalar qolǵa alyndy. Memleket basshysy qoǵamdyq sanany jańǵyrtý bastamasyn jarııalady. Negizgi maqsat - damyǵan 30 memlekettiń qataryna qosylý. Al sapaly zertteýler, tereń taldaýlar men boljamdar bolmasa, atalǵan maqsattarǵa jetý qıyn», - deıdi M.Áshimbaev.
Konferentsııa barysynda ınstıtýttyń barlyq basshylary men áriptesteri arnaıy medaldarmen marapattaldy. Osydan keıin jıyn paneldik sessııalar boıynsha jalǵasty. Keshke deıin qatysýshylar áleýmettik jańǵyrtý, tsıfrlyq qoǵam, jahandaný jaǵdaıynda ulttyq biregeılikti saqtaý jáne taǵy basqa mańyzdy máselelerdi talqylap shyqpaqshy.
