Qazaqstannyń sport jýrnalısteri bir qurylymǵa birikti
ASTANA. QazAqparat - Qazaqstannyń sport jýrnalısteri federatsııasynyń keńesinde Qazaqstannyń sport baspasózi qaýymdastyǵymen bir qurylymǵa birigý týraly sheshim qabyldandy. Sondaı-aq federatsııanyń jańa prezıdenti saılandy.
Bul týraly vesti.kz habarlaıdy.
QR Ulttyq Olımpıada Komıtetinde ótken kezdesýde respýblıkalyq qoǵamdyq birlestiktiń múshelerinen ózge, Ýnıversıada-2017 atqarýshy dırektsııasynyń dırektory Ilııa Orazaqov pen QR Ulttyq Olımpıada komıtetiniń marketıng jónindegi dırektory Sergeı Korolev boldy.
Jýyrda Bakýde ótken AIPS kongresinde Halyqaralyq sport baspasózi qaýymdastyǵynyń prezıdenti Djannı Merlo: «Qazirgi tańda sizdiń elge búkil álem nazaryn tigip otyr. Almatyda 2017 jylǵy Ýnıversıada ótedi, sondaı-aq ońtústik astanalaryńyz 2022 jylǵy qysqy Olımpıada oıyndaryn ótkizýge úmitker bolyp otyr. Osyǵan baılanysty biz sizderden sporttyq jýrnalıstıka salasynda úlken belsendilik kútemiz, ıaǵnı reporterler úshin semınarlar uıymdastyrylyp, jas tilshilerdi úıretý baǵdarlamasy qolǵa alynsa, halyqaralyq sport federatsııalarymen tyǵyz qarym-qatynastar ornatylsa quba-qup», - degen edi.
Aldaǵy aýqymdy sporttyq sharalar qazaqstandyq sport jýrnalısteriniń aldyna zor talaptar pen mindetter qoıyp otyr, olardy tek kúsh biriktirý arqyly eńserýge bolady. Sondyqtan munda qazaqstandyq sport jýrnalısteri federatsııasy men Qazaqstannyń sport baspasózi qaýymdastyǵynyń birigýi basty taqyryp boldy. Ashyq daýys berý barysynda jıynǵa qatysýshylardyń barlyǵy birlestik bastamasyn qoldady. Sondaı-aq QSJF Qazaqstannyń sport baspasózi qaýymdastyǵynyń Almatydaǵy ókildigi bolýǵa ázir ekenin bildirdi. Jıyn nátıjesinde qazaqstandyq sport jýrnalısteri federatsııasynyń prezıdenti bolyp biraýyzdan Ilıa Orazaqov saılandy.
