Qazaqstannyń sport mektebi eń úlken mektepterdiń biri - reseılik boksshy N.Valýev
ANA. 3 shilde. QazAqparat /Gúlmıra Álıakparova/ - Ekshn-fılmderdiń «Astana» halyqaralyq festıvaline qatysýǵa kelgen asa aýyr salmaqtaǵy álem chempıony, reseılik boksshy Nıkolaı Valýev Qazaqstannyń sport mektebi eń úlken mektepterdiń biri dep sanaıtyndyǵyn aıtty.
Keshe keshqurym festıval aıasynda «Han Shatyr» saýda, oıyn-saýyq ortalyǵynda N.Valýevtyń basty rólindegi «Kamennaıa bashka» fılminiń kórsetilimi boldy.
«Bul meniń alǵashqy basty rólim. Alǵashqy salmaqty tájirıbem. Túsirilimder bir jarym aıǵa sozyldy. Bul qyzyqty tájirıbe boldy. Sebebi men basqa salanyń adamymyn ǵoı. Túsirilimnen keıin kıno óneri - qajyrly, aýyr eńbek ekenin túsindim», - dedi ol kıno kórsetilimi bastalǵanǵa deıin jýrnalısterge bergen suhbatynda.
«Men bul kınony úsh ret kórdim. Dramalyq oqıǵa. Ony kórgende júregim syzdaıdy. Sondyqtan, sizderdiń ruqsattaryńyzben «Karıb teńiziniń pırattaryn» kóreıin», - dep qaljyńdady ol.
Jýrnalısterdiń: «Qazaqstandyq áriptesteriniń arasynda kimmen jaqsy tanyssyz?», degen saýalyna: «Serik Qonaqbaevty tanımyn. Biraq dospyz dep aıta almaımyn. S.Qonaqbaev qazaqstandyq boks úshin ańyz adam. Ony Keńes Odaǵyndaǵylardyń barlyǵy biledi. Qazaqstannyń boks mektebi eń úlkenderdiń biri. Qazaqstannyń boksshylary qashan da bolǵan jáne olar joǵary belesterge qol jetkize bermek. Sebebi senderde tálimgerlermen, oryn basar urpaqpen jáne Úkimettiń, Týrızm jáne sport mınıstrliginiń boksqa qarym-qatynasymen barlyǵy jaqsy», - dep túıindedi boksshy.
Nıkolaı Valýev - asa aýyr salmaqtaǵy dárejede óner kórsetetin reseılik kásibı boksshy. 1999 jylǵy Reseı chempıony. Panazıattyq boks qaýymdastyǵynyń nusqasy boıynsha álem chempıony (2000 jyl), Dúnıejúzilik boks qaýymdastyǵynyń nusqasy boıynsha álem chempıony (VBA (WBA) 2005 jyldyń 17 jeltoqsanynan 2007 jyldyń 17 sáýirine deıin jáne 2009 jyldyń 27 shildesinen 7 qarashasyna deıin), WBA nusqasy boıynsha álemniń ýaqytsha chempıony (2008 jyldyń 30 tamyzynan - 2009 jyldyń 27 shildesine deıin). Valýev WBA nusqasy boıynsha álem chempıony ataǵyn Devıd Heıge utylyp qalǵan 2009 jyldyń qarashasynan beri rıngke shyqqan joq.
