Qazaqstannyń sottary azamattyq, saýda isteri boıynsha shetelden dáleldemeler alatyn bolady

ASTANA. QazAqparat - Búgin QR Parlamenti Senatynyń jalpy otyrysynda «Azamattyq nemese saýda isteri boıynsha shetelde dáleldemelerdi alý týraly konventsııany ratıfıkatsııalaý týraly» QR Zańy qabyldandy. Qujat endi Memleket basshysynyń qol qoıýyna joldanady.

«Osy konventsııa arqyly Qazaqstan TMD (Reseı, Belarýs, Ýkraına, Armenııa) jáne Ekonomıkalyq yntymaqtastyq jáne damý uıymy (Aýstralııa, Germanııa, Ispanııa, Italııa, Frantsııa, Fınlıandııa, Týrtsııa, Sıngapýr, Ońtústik Koreıa) elderin qosa alǵanda, 53 memleketpen yntymaqtastyq ornata alady. Osy elderdiń ishinen biz halyqaralyq sharttar sheńberinde tek 7 elmen - Reseımen, Belarýspen, Armenııamen, Qytaı Halyq Respýblıkasymen, Úndistanmen, Lıtvamen jáne Túrkııamen yntymaqtasamyz. Al tutastaı alǵanda zańdy qabyldaý óz azamattaryn shetelde qorǵaý týraly konstıtýtsııalyq kepildikke sáıkes keledi», - dedi Ádilet mınıstri Berik Imashev.

Onyń aıtýynsha, Konventsııada bir eldiń sotynyń basqa eldiń aýmaǵynda dáleldemelerdi alýynyń birizdendirilgen tártibi aıqyndalǵan. Oǵan qatysý ásirese Qazaqstannyń sottarynyń shetelde ekonomıkalyq jáne ınvestıtsııalyq daýlardy qaraǵan kezde asa mańyzdy.