Qazaqstannyń sot júıesi Gaagadaǵy Sot ákimshiligi jónindegi halyqaralyq qaýymdastyqtyń quramyna kirdi
Delegatsııa quramynda Joǵarǵy sottyń sýdıasy Madııar Balken jáne Joǵarǵy sottyń janyndaǵy Sottardyń qyzmetin qamtamasyz etý departamentiniń basshysy Іlııas Ispanov boldy.
16-17 mamyrda delegatsııa Halyqaralyq qylmystyq sottyń shtab-páterinde (ICC) jáne Nıderlandy Koroldigi Qaýipsizdik jáne ádilet mınıstrliginiń Zertteý jáne qujattaý ortalyǵynda (WODC) boldy. Kezdesý barysynda qazaqstandyq tarap kórsetilgen uıymdardyń jumysymen tanysty, yntymaqtastyqty damytý jáne tájirıbe almasý týraly kelisimge keldi.
18-20 mamyrda delegattar Gaagadaǵy Dúnıejúzilik saýda ortalyǵynda ótip jatqan IASA 11-aýmaqtyq konferentsııasyna qatysty. Forýmnyń taqyryby: «Sot tóreligin basqarýǵa óńirlik jáne jahandyq kózqarasty nasıhattaý». Konferentsııa jumysy birqatar taqyryptyq sessııa boıynsha ótti.
Konferentsııada sýdıa M. Balken Qazaqstan Respýblıkasyndaǵy sot ákimshiligi jónindegi jumysty uıymdastyrýdy tanystyrypshyqty. Baıandama aıasynda «100 naqty qadam» Ult josparynyń sheńberinde qarastyrylǵan reformalarǵa erekshe nazar aýdaryldy. Atap aıtqanda, bul Sot tóreligi akademııasyn, Joǵarǵy sot janyndaǵy Halyqaralyq keńesti, AIFC Halyqaralyq arbıtrajdyq ortalyqty jáne Astana qalasyndaǵy qarjy sotyn qurý, ınvestıtsııalyq daýlar boıynsha sot isin júrgizýi qyzmetiniń bastalýy.
IASA-men kelissózderdiń nátıjesinde Qazaqstan Respýblıkasynyń Joǵarǵy Soty bul uıymnyń qatysýshysyna aınaldy. Qaýymdastyqtyń basqarmalar keńesiniń sheshimimen sýdıa Madııar Balken Orta Azııa, Reseı, Túrkııa jáne Mońǵolııa elderi úshin IASA-nyń óńirlik vıtse-prezıdenti bolyp saılandy.
IASA-nyń bas keńsesi Verdjınııada (AQSh) ornalasqan. Zańnyń ústemdigin ustanǵan elderde kásibı sot ákimshiligin engizýdi IASA óziniń mıssııasy dep sanaıdy. IASA sot ákimshiligi jáne basqarý boıynsha halyqaralyq konferentsııalardy, forýmdardy, bilim berý jáne trenıngtik baǵdarlamalardy qarjylandyrýǵa, sondaı-aq sýdıalarǵa, sottar ákimshilerine jáne basqa qyzmetkerlerge sot júıesin jetildirýge resýrs berýge baǵyttalǵan.
Qaýymdastyqtyń qyzmeti sot júıesin jáne ákimshilik qurylymdardy basqarý, sot júktemesin retteý, sot is júrgizýin ońtaıly basqarý praktıkasyn qurý, avtomattandyrylǵan sot-aqparattyq júıelerdi engizý jáne t.b. sot ákimshiliginiń praktıkalyq aspektine baǵyttalǵan.
IASA-nyń ártúrli qurylymdaryna AQSh, Kanada, Avstralııa, Ulybrıtanııa, GFR, Nıderlandy, Italııa, Shveıtsarııa, QHR, Argentına, Mońǵolııa, Indonezııa, Reseı, Ázirbaıjan, Qyrǵyzstan ókilderi qatysady.
Konferentsııa sheńberinde EKSPO-2017 kórmesin ótkizý máseleleri jónindegi materıaldardyń tusaýkeseri ótti.
