Qazaqstannyń sot saraptamasy sheshimderi álemniń 90 memleketinde moıyndalady
ASTANA. QazAqparat - Qazaqstannyń sot saraptamasy mamandarynyń shyǵarǵan sheshimderi álemniń 90-nan astam memleketinde moıyndalady, dep xabarlaıdy QazAqparat. Bul týraly QR Ádilet mınıstrligi Sot saraptamasy ortalyǵynyń dırektory Isıdor Borchashvılı málim etti.
Aıta keteıik, búgin birqatar Májilis depýtaty atalmysh ortalyqtyń jumysymen tanysty.
«Bizge xalyqaralyq deńgeıge shyǵý kerek, al ol úshin akkredıtatsııadan ótýimiz shart. Bizdiń elde qanshalyqty myqty mamandar baryn dáleldeýge tıispiz. Bir aıta ketetin jaıt - Astanadaǵy Sot saraptamasy ortalyǵy byltyr akkredıtatsııadan sátti ótti. Endi bıyl keńeıýdemiz, oblystar boıynsha da osyndaı akkredıtatsııadan ótetin bolamyz. Bul - Qazaqstannyń sot saraptamasy mamandarynyń shyǵarǵan sheshimderi, dáleldeme baza retinde álemniń 90-nan astam memleketinde moıyndalady degen sóz», - dedi Borchashvılı.
Ortalyq Aqmola, Almaty, Shyǵys Qazaqstan jáne Qaraǵandy oblystarynda ornalasqan zertxanalarǵa sapa standarttaryn engizýdi mejelenip otyr.
Kezdesý barysynda Parlamentpen qabyldanǵan jańa zańnamalyq aktilerdiń birqatar qaǵıdattary talqyǵa salyndy. Májilis depýtaty Svetlana Bychkova Parlament qabyrǵasynda qaralyp jatqan «QR-daǵy sot-saraptama qyzmeti týraly» zań jobasynyń jańashyldyqtarymen tanystyryp ótti. Onyń eń basty jańalyǵy - eldegi sarapshylyq fýnktsııalardy bir memlekettik organnyń ishinde ortalyqtandyrý jospary. Zań jobasy boıynsha, elde jekemenshik sot sarapshylary ınstıtýtyn damytý, sot sarapshylary palatasyn qurý kózdelgen.
