Qazaqstannyń «Sońǵy muǵalimi» Túrkııadan júldemen oraldy

ASTANA. QazAqparat - Jas rejısser Alen Rahmetalıev túsirgen «Sońǵy muǵalim» qysqametrajdy kórkem fılmi Ystanbulda ótken Dostluk Kısa Film Festival halyqaralyq kınofestıvalinde ekinshi oryndy ıemdendi, dep habarlaıdy QazAqparat Qazaqfılm kınostýdııasyna silteme jasap.

Kınotýyndyny QR Mádenıet jáne sport mınıstrliginiń tapsyrysy boıynsha Sh.Aımanov atyndaǵy «Qazaqfılm» kınostýdııasy túsirgen. Fılmde jýas hımııa pániniń muǵalimi Erjan Qaıdarulynyń ómiri baıandalady. Onyń sabaqtarynda oqýshylar únemi shýlap otyrady. Bir kúni joǵarǵy synyp oqýshylarynan jábir kórgen ulyn qorǵamaq bolǵan ustaz olarmen kúrespek bolady.  

«Bul festıval aýqymdy baıqaýlardyń biri. Oǵan Iran, Qyrǵyzstan, Túrkııa, Frantsııa, Italııa, Belgııa jáne Shvetsııa syndy elderdiń fılmderi qatysty. Osy festıvalge qatysqannyń ózi jeńis dep sanaımyn. Festıval uıymdastyrýshylary men qonaqtary qazaq kınosyna erekshe qyzyǵýshylyq tanytty», - dedi rejısser Alen Rahmetalıev.
 

Aıta ketsek, Dostluk Kısa Film Festival kınofestıvali dostyqqa negizdelgen, adamzat pen ǵalamnyń arasyndaǵy baılanysty  nasıhattaıtyn kınonyń barlyq janry men formatyn óz aýdıtorısyna usynatyn birden bir festıval bolyn sanalady.