Qazaqstannyń soltústik óńirlerindegi halyq sany mıllıon adamǵa qysqarýy múmkin - M. Ábilqasymova
ASTANA. QazAqparat - Qazaqstannyń soltústik óńirlerindegi halyq sany 2050 jylǵa qaraı mıllıon adamǵa azaıýy múmkin. Búgin Májilistiń Áleýmettik-mádenı damý komıtetiniń keńeıtilgen otyrysynda Ekonomıka jáne bıýdjettik josparlaý vıtse-mınıstri Mádına Ábilqasymova osylaı aıtty.
Basqosýda Qazaqstannyń ishki jáne syrtqy kóshi-qon problemalary talqylanǵan bolatyn.
Vıtse-mınıstrdiń sózine qaraǵanda, atalmysh úderis negizinen ishki jáne syrtqy kóshi-qon problemalarynda qordalanǵan máselelerge baılanysty oryn alýy múmkin. «Respýblıkamyzdyń Qostanaı, Pavlodar, Soltústik Qazaqstan, Shyǵys Qazaqstan sekildi oblystarynda qalyptasqan demografııalyq quldyraý úderisi saqtalatyn bolsa, onyń saldarynan keleshekte jumysshy kadrlar tapshylyǵy oryn alýy yqtımal. Al 2050 jylǵa qaraı osyndaı jaǵdaıǵa sáıkes, soltústik oblystardaǵy halyq sany mıllıon adamǵa deıin azaıatynyn boljaýǵa bolady. Bul rette elimizdiń ońtústik óńirlerindegi halyq sany kerisinshe 5,2 mıllıon adamǵa artýy múmkin», - dedi M. Ábilqasymova. Onyń paıymdaýynsha, bundaı jaǵymsyz úderistiń saqtalýy jumys oryndaryna qatysty usynystyń sáıkessizdigi, óńirlik jalpy ishki ónim ósiminiń kemýi, eńbek kúshiniń jetispeýshiligi sekildi problemalardy týdyrady. Sondyqtan da, vıtse-mınıstrdiń oıynsha, jumys kúshi jetkiliksiz óńirlerge eńbek mıgranttaryn kóshirýdi yntalandyrýdyń tyń tetikterin iske qosý qajet.
«Jalpy, osyǵan baılanysty aıta keterligi, oralmandardy ornalastyrý saıasatynda buǵan deıin birqatar qatelikter oryn aldy, qonystandyrý jumysy tepe-teńdikti saqtap júzege aspady, ondaǵy óńirlerdiń áleýmettik-ekonomıkalyq suranystary eskerilmedi. Máselen, statıstıkalyq málimetterge súıensek, oralmandardyń 50 paıyzdan astamy Ońtústik Qazaqstan, Almaty, Mańǵystaý, Jambyl oblystaryna shoǵyrlanǵan. Al atalǵan óńirler áleýmettik ınfraqurylymdar men jumys oryndaryna qatysty onsyz da aıtarlyqtaı demografııalyq qysymǵa ushyrap otyrǵan bolatyn», - deıdi M. Ábilqasymova.
