Qazaqstannyń soltústik óńirlerin Reseıge «qaıtarý» kerek dep júrgenderge BAQ qajet emes pıar jasaýda - QR SІM
ASTANA. QazAqparat - Qazaqstannyń soltústik óńirlerin Reseıge berý kerek dep áleýmettik jelilerde daýryǵyp júrgenderge BAQ ókilderi qajet emes pıar jasaýda. Bul týraly búgin Ortalyq kommýnıkatsııalar qyzmetinde ótken brıfıngte jýrnalısterdiń suraǵyna jaýap berý barysynda QR Syrtqy ister mınıstriniń orynbasary Erjan Ashyqbaev aıtty.
«Eger de biz mundaı margınaldy toptardy jıi eske alyp, jıi aıta beretin bolsaq, ózimiz olarǵa eriksiz pıar jasaımyz. Olardyń buryndary Reseı Federatsııasyna qarasty jerlerdi qaıtarý kerek-mys degen ashý týǵyzar sózderdi aıtýdaǵy kózdegeni de - osy», - dedi ol.
Onyń aıtýynsha, osyndaı toptardyń sózderine BAQ ókilderi neǵurlym az nazar aýdarsa, bizge tıetin paıdasy da soǵurlym kóp bolmaq. Sondaı-aq, vıtse-mınıstrdiń aıtýynsha, búginde áleýmettik medıa eshqandaı tusaý salynbaıtyn erekshe keńistik. «Sizder adamdardyń oılaryn baqylaýda ustap otyra almaısyzdar ǵoı», - deıdi E. Ashyqbaev.
Vıtse-mınıstrdiń aıtýynsha, búginde Qazaqstan men onyń mańyzdy strategııalyq áriptesi - Reseı Federatsııasy arasynda eshqandaı terrıtorııalyq kelispeýshilik joq.
«Biz eń aldymen osy resmı ustanymǵa nyq bolýymyz qajet», - dedi E. Ashyqbaev.
