Qazaqstannyń soltústik oblystaryndaǵy qatty aıazdyń beti qaıtady
ASTANA. QazAqparat - 21-23 qarasha aralyǵynda Qazaqstannyń ortalyq aýdandarynyń ústinen ótip jatqan tsıklon men onymen baılanysty atmosferalyq aǵymdar respýblıkanyń kóptegen oblystarynda jaýyn-shashyndar týdyryp, jańbyr, qar ákeledi.
Demalys kúnderi ońtústik, ortalyq jáne shyǵys aýdandarynda onyń áseri saqtalyp, biraq shyǵysqa qaraı yǵysýymen, álsireı bastaıdy. Óńirlerde aýa temperatýrasy áli de kópjyldyq mánnen 2-5 gradýsqa joǵary bolady, tek 23 qarashada ol ortasha kópjyldyq mánder shamasynda, al shyǵysta - odan 3-6 gradýs tómen bolatyny kútilýde, dep habarlaıdy «Qazgıdromet» RMK.
Qazaqstannyń soltústik oblystaryndaǵy aýa raıyna áli Sibir antıtsıklony áser etýde, sondyqtan mundaǵy túngi temperatýra kóbine 22-30 gradýs sýyqty kórsetip saqtalady, bul klımattyq normadan 5-10 gradýsqa tómen. Biraq Reseıdiń Eýropalyq aýmaǵynan jylý men ylǵaldyń úlken qory bar tsıklon shyǵysqa qaraı baıaý yǵysyp, onyń ornyn basyp keledi. Osylaısha, dúısenbi kúni batys jáne soltústik oblystarda aýa temperatýrasy kóteriledi.
