Qazaqstannyń soltústiginde qar jaýýy múmkin
ASTANA. QazAqparat - Qazaqstannyń soltústik bóliginde 11-13 qazan kúnderi aýa raıy jaýyn-shashyndy bolyp, qar jaýýy múmkin, dep habarlaıdy QazAqparat Qazgıdrometke silteme jasap.
«Aldaǵy úsh kúnde Qazaqstannyń soltústik aımaqtarynda aýa raıy jaýyn-shashynnyń sońy qarǵa ulasyp, kún sýytýy múmkin. 11 qazan kúni kúndizgi aýa temperatýrasy 13...20°S aralyǵynda bolsa, 13 qazanda 0...plıýs 8°S, al túnde 0...mınýs 5°S aralyǵynda bolady. Mundaı aýa raıy respýblıka aýmaǵyna Reseıdiń eýropalyq bóliginiń soltústik aýdandarynan kele jatqan arktıkalyq sýyq aýa aǵyndaryna baılanysty» delingen habarlamada.
Qazaqstannyń ońtústiginde, ońtústik-shyǵysynda jáne shyǵysynda sýyq aýa aǵyndarynyń áseri 12 jáne 13 qazan kúnderi baıqalady. Atalǵan óńirlerde ázirshe jańbyr jaýady, degenmen taýlarda jańbyrdyń arty qarǵa ulasýy yqtımal.
