Qazaqstannyń ShYU elderimen saýda aınalymy $ 50 mlrd qurady
Bul týraly Tashkentte Shanhaı Yntymaqtastyq Uıymyna múshe memleketterdiń ónerkásip mınıstrleriniń keńesinde QR Indýstrııa jáne ınfraqurylymdyq damý vıtse-mınıstri Marat Qarabaev málimdedi, dep habarlaıdy QazAqparat.
Qazaqstan delegatsııasynyń basshysy áriptesterine Qazaqstannyń ónerkásip kooperatsııasy salasynda júrgizip jatqan jumysy týraly aıtyp berdi.
«Qazirgi tańda bizde Reseı Federatsııasymen ónerkásip salasynda 60 kooperatsııalyq joba, Qytaımen joǵary tehnologııa salalarynda qosylǵan quny joǵary 50 birlesken joba, Ózbekstanmen shamamen 15 joba bar. Búgin tájik tarapymen ekijaqty kelissózder barysynda ónerkásip kooperatsııasy boıynsha odan ári yntymaqtastyq strategııasyn aıqyndadyq. Úndistanmen arada taý metallýrgııa kesheni men jerdiń sırek kezdesetin materıaldary boıynsha yntymaqtastyq baǵyttary qyzý talqylanyp jatyr. Pákistanmen jeńil ónerkásip baǵytynda is-qımyl damyp jatyr», - dedi Marat Qarabaev.
Vıtse-mınıstr Qazaqstannyń ShYU elderimen taýar aınalymy qarqyndy ósip kele jatqanyn basa aıtty. Ótken jyly ol 10 mlrd dollar ósim kórsetti.
«2020 jyly taýar aınalymy 40 mlrd dollar bolsa, 2021 jyldyń qorytyndysy boıynsha ol 50 mlrd dollarǵa jetti. Osy 50 mlrd ishinen - 31 mlrd dollar ónerkásip baǵytyna tıesili. Bul árıne bizdi qýantady, óıtkeni ónerkásiptik taýar aınalymy 62% qurady», - dep atap ótti vıtse-mınıstr.
