Qazaqstannyń short-trek quramasy Azııa Kýbogynda 5 qola qanjyǵalady - Beıjiń
BEIJІŃ. 5 sáýir. QazAqparat /Rýslan Súleımenov/ - Qazaqstan quramasy 1-3 sáýirdiń aralyǵynda Beıjińde short-trekten ótken Azııa kýbogynda 5 qola medal ıelendi.
Baıraqty básekege Qazaqstan, Qytaı, Koreıa, Japonııa, Gonkong, Úndistan jáne Malaızııa elderinen jeti komanda qatysty.
1 sáýir kúni bolǵan jarysta Qazaqstan quramasynyń qorjynyna Marııa Zınchenko, Darıa Goncharova jáne Olga Tıhonovalar 2000 metrlik estafetada birinshi «qolany» salsa, 2 sáýir kúni qorjyn taǵy tórt qolamen tolyqty: Fedor Andreev, Rınat Majenov, Danabek Haırov, Darıa Volokıtına, Anastasııa Kýznetsova jáne Ksenııa Motova syndy jas sportshylar estafeta jarystarynda eki «qola» ıelendi.
Al 500 metrge jeke jarystarda jasóspirimder arasynda Darıa Volokotına, erler arasynda Artýr Sultanǵalıev máre syzyǵyn úshinshi bolyp kesti.
Qazaqstan Respýblıkasynyń eńbek sińirgen jattyqtyrýshysy Leonıd Lı: «Biz buǵan deıin Azııa kýbogynda munshalyqty medal alǵan emespiz. Biraq bul joly biz jaman óner kórsetken joqpyz. Jeke jarystarda da alǵash ret qanjyǵamyz maılanyp otyr, sondyqtan maýsymdy jaqsy nátıjemen aıaqtaýdamyz», - dedi.
Komandany Azııa chempıonaty bas jattyqtyrýshy Mádiǵalı Qarsybekov, halyqaralyq sanattaǵy sport sheberleri Nıkolaı Fedorenko men Jasulan Muhambetqalıevter daıyndady.
