Qazaqstannyń shet elderdegi mekeme basshylarymen ınvestıtsııa máselesi talqylandy

NUR-SULTAN. QazAqparat – QR Premer-Mınıstriniń orynbasary – Syrtqy ister mınıstri Muhtar Tileýberdiniń tóraǵalyǵymen sheteldik ınvestıtsııalardy tartý máseleleri boıynsha Qazaqstannyń shet elderdegi mekemeleriniń basshylarymen onlaın-kezdesý ótti, dep habarlaıdy QazAqparat.

QR SІM-nen málim etkendeı, sondaı-aq is-sharaǵa beıindi jáne salalyq mınıstrlikterdiń, «Astana halyqaralyq qarjy ortalyǵy» AQ basshylyǵy jáne «Kazakh Invest» AQ-nyń shet elderdegi ókilderi qatysty.

Іs-shara barysynda SІM basshysy elimizge tartylatyn tikeleı sheteldik ınvestıtsııalar kólemin 2025 jylǵa qaraı 30 mlrd AQSh dollaryna deıin ulǵaıtý jónindegi mindetter turǵysynan sheteldik mekemelerdiń ınvestıtsııalyq baǵyttaǵy jumysyn kúsheıtý men jandandyrýdyń mańyzdylyǵyna nazar aýdardy. Osy turǵyda dıplomatııalyq ókildikterdiń jumysy jyl qorytyndysy boıynsha negizgi kórsetkishterge qol jetkizý, onyń ishinde qabyldanǵan eldik ınvestıtsııalyq baǵdarlamalar sheńberinde baǵalanatyn bolady.

Dıpmıssııa basshylary ınvestorlarmen jumys isteý jáne 2021 jylǵy 26 qańtarda Úkimettiń keńeıtilgen otyrysy sheńberinde Memleket basshysynyń tapsyrmasy boıynsha ázirlengen eldegi ınvestıtsııalyq jobalardy súıemeldeý jónindegi jańa tásildermen, sondaı-aq ortalyq memlekettik organdardyń, jergilikti atqarýshy organdar men ulttyq kompanııalardyń birinshi basshylarynyń orynbasarlaryna ınvestıtsııa tartý máselelerin bekitýmen egjeı-tegjeıli tanysty.

Vedomstvoaralyq ózara is-qımyldy odan ári kúsheıtý jáne elshilikterdiń jumysyn úılestirý úshin ınvestıtsııalyq-ekonomıkalyq trekte beınebaılanys arqyly sheteldik mekemelerdiń beıindi vedomstvolarmen, ákimdiktermen jáne uıymdarmen turaqty negizde nysanaly kezdesýler ótkizý týraly sheshim qabyldandy.