Qazaqstannyń Shekara qyzmeti avıatsııasy Jeńis paradyna daıyndalýda (FOTO, VIDEO)

ASTANA. QazAqparat - Shekara qyzmetiniń avıatsııasy bıyl alǵash ret Otan qorǵaýshylar kúni men Jeńistiń 70 jyldyǵyna arnalǵan áskerı paradqa qatysady, dep habarlaıdy QR UQK ShQ baspasóz qyzmetinen.

Áskerı parad kezinde shekarashylardyń «Mı-171Sh» tikushaǵy men «An-74» jáne «An-26» ushaqtary «Syna» («Klın») áskerı tártibimen ushyp ótetin bolady.

Qazirgi ýaqytta áýe ekıpajdary úlken daıyndyq ústinde. Shekaralyq ushqyshtar áýedegi ara qashyqtyq, bıiktik, ýaqytty esepteý jaǵynan ınjenerlik-shtýrmandyq esepterin, ushqyshtyq sheberlikterin shyńdaı túsýde.

Paradqa qatysatyndardy irikteý, daıyndaý jumystary aldyn ala bastalǵanymen, áskerı parad bolatyn ýaqyt jaqyndaǵan saıyn jattyǵýlar óte úlken jaýapkershilikpen ótýde. Elorda turǵyndary men qonaqtary Jeńis kúnindegi áskerı parad kezinde shekaralyq ushqyshtardyń áýedegi sheberligin tamashalaıtyn bolady.