Qazaqstannyń shalǵaıdaǵy 200 aýyly 1 qyrkúıekke deıin ınternetke qosylady
Mundaı mindettemeni talshyqty-optıkalyq baılanys jelisin taratatyn operatorlar alyp otyr. Oǵan sáıkes, úsh aı ishinde 201 aýylǵa joǵary jyldamdyqtaǵy ınternet qosylady. Birinshi kezekte 223 mektep, 191 aýrýhana, 117 ákimdik úshin ǵalamtor qoljetimdi bolmaq. Bul nysandar Jambyl, Qaraǵandy, Qyzylorda, Pavlodar jáne Túrkistan oblystarynyń aýyldarynda ornalasqan.
Jalpy, 2019 jyly «Qazaqstan Respýblıkasynyń aýyldyq eldi mekenderin talshyqty-optıkalyq baılanys jelileri tehnologııasy boıynsha keń jolaqty qoljetimdilikpen qamtamasyz etý» jobasyn iske asyrý sheńberinde 685 aýyldy eldi mekende ornalasqan 2 myńnan astam memlekettik organ men bıýdjettik uıymdy ınternetke qosý josparlanǵan.
Atalǵan jumys «Tsıfrlyq Qazaqstan» memlekettik baǵdarlamasy men aýyldardy sapaly ınternetpen qamtamasyz etý boıynsha mindetterdi oryndaý sheńberinde júrgiziledi. Eldi mekenderdiń tizimi aýdan ortalyqtary men qalalardan alshaqtyǵy, halyqtyń sany 500 turǵynnan kem bolmaýy, memlekettik, bilim berý jáne medıtsınalyq uıymdardyń bolýy sekildi talaptarǵa saı jasalǵan bolatyn.
«Qazirgi zamanǵy telekommýnıkatsııalyq ınfraqurylymdy qurý baǵytyndaǵy jumys halyqqa zamanaýı baılanys qyzmetterine qoljetimdiligin qamtamasyz etýge múmkindik beredi. Osylaısha, Qazaqstanda ınternetti paıdalanýshylardyń úlesi 2018 jyly 81,3 paıyzǵa jetti. Bul baǵyttaǵy jumys jalǵasatyn bolady», - dep atap ótti QR Tsıfrlyq damý, qorǵanys jáne aeroǵarysh ónerkásibi mınıstrligi Telekommýnıkatsııa komıtetiniń tóraǵasy Vıtalıı ıAroshenko.
