Qazaqstannyń shahmatshy qyzdary men álem quramasy arasyndaǵy match bastaldy

ASTANA. QazAqparat – Elordada shahmattan Qazaqstan áıelder quramasynyń álem quramasyna qarsy matchy bastaldy, dep habarlaıdy QazAqparat tilshisi.

Bul jarys 19 sáýirge deıin «Astana» halyqaralyq qarjy ortalyǵy aýmaǵynda rapıd jáne blıts túrleri boıynsha ótedi.

Ulttyq komandany grossmeıster Gúlmıra Dáýletova, álem quramasyn grossmeıster Dana Reıznıetse-Ozola basqarady. Ár komandanyń quramynda 8 adamnan bar.

«Osymen birneshe apta boıy Qazaqstan astanasynda álemdik tarıhı oqıǵa ótip jatyr. Álemdik shahmatshylar – ıAn Nepomnıaşıı men Dın Lıjen arasyndaǵy jarysty dúnıe júzi baqylap otyr. Osy múmkindikti paıdalana otyryp, oıyn ótkizý múmkindigin bergeni úshin FIDE-ge jáne ony joǵary deńgeıde uıymdastyrǵany úshin bizdiń qazaqstandyq shahmat federatsııasyna alǵys aıtqym keledi. Búgin jyldam shahmattan, rapıdten alǵashqy oıyn ótedi. Bizdiń úzdik shahmatshy qyzdar saıysqa túsedi, olarǵa úlken sáttilik tileımin. Meniń oıymsha, bul shara óskeleń urpaqqa úlgi bolady. Sizderge qarap, bizdiń jas shahmatshylar qataryńyzdy tolyqtyratynyna jáne elimizde ıntellektýaldy oılaıtyn adamdar kóp bolatynyna senimdimin», - dep atap ótti Mádenıet jáne sport mınıstri Ashat Oralov matchtyń ashylý saltanatynda.

Shahmat arenasynda Qazaqstan atynan Bıbisara Asaýbaeva, Jansaıa Ábdimálik, Dınara Sádýaqasova, Merýert Kamalıdenova, Lııa Qurmanǵalıeva, Ksenııa Balabaeva, Alýa Nurmanova, Zarına Nurǵalıeva baq synaıdy.

Qazaqstandyq oıynshylarǵa qarsy qytaılyq shahmat juldyzy, tórt dúrkin álem chempıony jáne FIDE reıtınginde №1 shahmatshy, 29 jastaǵy Hoý Ifan, sondaı-aq ataqty Nana Zagnıdze (Grýzııa), Harıka Drıýnavallı (Úndistan), Gıýnaı Mamezade (Ázirbaıjan), Nýrgıýl Salımova (Bolgarııa), Joka Gaal (Vengrııa), Shrı B. Savıta (Úndistan), sondaı-aq Afrýza Hamdamova (Ózbekstan) shyǵady.

Sonymen birge, saltanatty ashylý rásiminde jerebe tartyldy, onda Qazaqstan quramasynan Dınara Sádýaqasova Hoý Ifanǵa qarsylas bolatyny anyqtaldy.

Ekinshi taqtada Harıka Drýnavallı Merýert Kamalıdenovaǵa qarsy oınaıdy.

Úshinshi taqtada Bıbisara Asaýbaevaǵa qarsy Gıýnaı Mamezade oınaıdy.

Tórtinshi taqtada Nana Zagnıdze Jansaıa Ábdimálikke qarsy oınaıdy.

Qazaqstan shahmat federatsııasynyń prezıdenti Tımýr Turlov dástúr boıynsha matchtyń alǵashqy júrisin jasady.