Qazaqstannyń shahmatshy qyzdary Álem chempıonatyn 4-orynmen aıaqtady
NUR-SULTAN. QazAqparat – Halyqaralyq grossmeıster, otandasymyz Dınara Sadýaqasova Ispanııada ótken Álem chempıonatynyń jeke synynda qola júldeni jeńip aldy, dep habarlaıdy QazAqparat tilshisi.
Bul týraly Olımpıadalyq emes sport túrleri boıynsha sportty damytý dırektsııasynyń Facebook-tegi paraqshasynda málim etildi.
«Elordalyq sportshy, elimizdiń maqtanyshy Dınara Sadýaqasovany Álem chempıonatyndaǵy qola júldesimen shyn júrekten quttyqtaımyz!
Ispanııanyń Sıtjes qalasynda shahmattan áıelder arasynda komandalyq Álem chempıonaty ótti. Baıraqty básekede álemniń 12 eli: AQSh, Ázerbaıjan, Armenııa, Germanııa, Grýzııa, Úndistan, Ispanııa, Polsha, Reseı, Frantsııa, Ýkraına, Qazaqstannyń úzdik shahmatshylary baq synady.
Halyqaralyq grossmeıster Dınara Sadýaqasova ekinshi taqtada oınap, jeke esepte qola júldeni jeńip aldy», - dep jazylǵan dırektsııanyń málimetinde.
Al komandalyq esepte Qazaqstan quramasy úzdik tórttikti qorytyndylady.
«Reseılik qyzdar jarys jeńimpazy atansa, Úndistan quramasy ekinshi oryndy jeńip aldy. Al úshinshi oryndy Ýkraına jáne Grýzııa shahmatshylary ózara bólisti.
Sondaı-aq, 16 jastaǵy shahmatshy, halyqaralyq dárejedegi áıelder sheberi Merýert Kamalıdenovaǵa jekeleı syńda qola medal buıyrdy. Ol úshinshi taqtada oınap, Úndistan men Ýkraına komandalaryna qarsy matchta tamasha nátıje kórsetti.
Dınara men Merýertti Álem chempınatyndaǵy qola júldesimen quttyqtaımyz! Sportshylarymyzǵa aldaǵy baıraqty básekelerde jarqyn jeńister men tolaǵaı tabystar tileımiz», - delingen jazbada.
