Qazaqstannyń shahmat quramasy Azııa halyqtary kýbogynyń altynyn utyp aldy
ASTANA. QazAqparat - Irannyń Tebrız qalasynda 20-30 mamyr aralyǵynda ótken shahmattan Azııa halyqtary kýbogynda Qazaqstannyń erler komandasy tez oınalatyn shahmattan altyn medel jeńip aldy. Olar fınalda qytaılyq shahmatshylardy 2,5:1,5 esebimen jeńdi.
«Bizdiń shahmatshylar birliktiń rýhyn kórsetti. Qytaı komandasyn jeńý - úlken jetistik, óıtkeni olar shahmat boıynsha álemdik reıtıngte úshinshi orynda tur. Al biz qyryq besinshi satydamyz. Komandalar arasyndaǵy aıyrmashylyq - shamamen 200 pýnkt. Bul saıys komandalyq jarystar jeke jarystardan ózgeshe bolatynyn jáne tek qana juldyzdar jınalǵan komanda únemi jeńe bermeıtinin kórsetti», - dedi QR shahmattan erler komandasynyń jattyqtyrýshysy Serikbaı Temirbaev.
Onyń aıtýynsha, biraz ýaqyt úzilisten keıin Qazaqstan komandasy Azııada qaıtadan jeńimpaz boldy, osy arqyly elimizdiń shahmat mektebi tıisti deńgeıde ekenin, kerek kezinde jańa talanttardy tárbıelep shyǵara alatynyn kórsetti.
«Qazaqstan shahmat quramasy - eń jas quramalardyń biri. 2014 jyldyń 1 qańtaryndaǵy derekter boıynsha, ol jas shamasy jaǵynan álemdegi ekinshi jas komanda. Al eń jas qurama ataǵy qazir Túrkııada», - dedi S. Temirbaev.
