Qazaqstannyń seısmıkalyq tózimdi qurylys salasyndaǵy normalaryn AQSh pen Japonııanyń qurylys normalarymen salystyrýǵa bolady - S. Nokın
ASTANA. Tamyzdyń 24-i. QazAqparat /Qanat Mámetqazyuly/ - Qazaqstannyń seısmıkalyq tózimdi qurylys salasyndaǵy normalaryn AQSh pen Japonııanyń qurylys normalarymen salystyrýǵa bolady. Búgin bul týraly Úkimet úıinde ótken selektorlyq keńeste Qurylys isteri jáne turǵyn-úı kommýnaldyq sharýashylyq agenttiginiń tóraǵasy Serik Nokın málim etti.
Sóz arasynda Agenttik tóraǵasy elimizdegi ǵımarattar men qurylystardyń seısmıkalyq jaǵdaıyn kúsheıtý týraly usynystar ázirlenip jatqanyn jetkizdi. Onyń sózine qaraǵanda, 2005 jyldan beri qaraı Almaty qalasy men oblysy boıynsha 200 bilim nysany, 170 densaýlyq mekemeleri, 25 mektepke deıingi bilim nysandary, 120 áleýmettik mádenı-turmys nysandary, sondaı-aq 300-den astam ǵımarattar men qurylystar tekserýden ótken. Budan bólek, 2007 jyly Japonııanyń halyqaralyq yntymaqtastyq agenttigimen birlese otyryp, pasporttaýdy júrgizý kezinde esepke alý úshin 320 kópqabatty jáne 41 jeke turǵyn úı nysandary zerttelgen.
«Jalpy, alǵanda seısmıkalyq tózimdi qurylys salasyndaǵy normatıvtik-tehnıkalyq bazaǵa keletin bolsaq, bul 20 qujatpen reglamentteledi. Bul rette seısmıkalyq qaýipti aımaqtary bar basqa memleketterdiń uqsas normalarymen salystyrǵanda Qazaqstannyń qoldanystaǵy normalary eń qatań bolyp tabylady. Bul normalardy AQSh pen Japonııanyń qurylys normalarymen salystyrýǵa bolady» dedi ol.
