Qazaqstannyń segiz boksshysy álem chempıonatynyń jartylaı fınalyna qatysady
ASTANA. 13 qyrkúıek. QazAqparat - Segiz qazaqstandyq boksshy Kıevte ótetin jasóspirimder arasyndaǵy bokstan álem chempıonatynyń jartylaı fınalyna shyǵatyn boldy. Oǵan qatysý arqyly olar kem degende týrnırdiń qola júldesin ıelenedi, dep habarlaıdy Vesti.kz.
Beısenbi kúni shırek fınal kezdesýleri ótti. Onyń qorytyndysy boıynsha jartylaı fınalda Álimjan Beskempir (46 keli salmaq dárejesi boıynsha), Serik Temirjanov (48 keli), Stoıan Mazýr (50 keli), Baýyrjan Temirhan (52 keli), Abylaıhan Júsipov (57 keli), Rahat Marjyqpaev (66 keli), Qadyrbek Sádirbek (70 keli) men Dmıtrıı Zısko (80 keliden joǵary) óner kórsetedi.
Atap ótý kerek, qazaqstandyq boksshylar jartylaı fınalǵa ótken sportshylar sany boıynsha ekinshi orynda tur. Birinshi orynda - Reseı quramasy, olardan 10 adam jartylaı fınalǵa ótti. Al úshinshi orynda - ýkraındyqtar, olardyń bes sportshysy ótti.
Kıevtegi álem chempıonaty 16 qyrkúıek kúni aıaqtalady.
