Qazaqstannyń saıası júıesi zamanaýı talaptarǵa saı damyp keledi – Zarema Sháýkenova
«2021 jylǵy parlamenttik saılaý kezekti naýqan sanalady. Ol Zańmen belgilengen merzimge saı ótkeli otyr jáne elimizdegi barlyq saıası partııanyń saılaý kezeńine sapaly daıyndyq júrgizý úshin teńdeı ári jetkilikti ýaqyty boldy. Saılaý protsesi ekonomıkalyq qıyndyqtarǵa, pandemııa men halyqaralyq ahýaldyń belgili bir deńgeıdegi áserine qaramastan turaqty ishki aıada ótip jatqany óte mańyzdy. Alǵash ret barlyq deńgeıdegi máslıhattardyń depýtattaryn saılaý tepe-teńdik júıesi negizinde ótkiziletin bolady. Árıne, bul saıası partııalar úshin olardyń saılaýaldy qyzmetterine júktemeni aıtarlyqtaı arttyrǵany da sózsiz. Osy jolǵy saılaý naýqanynyń bir ereksheligi partııalar óz tizimine, ásirese, jastar men áıelderdiń jańa tolqynyn qosyp otyr. Bul Prezıdent bastamalarynyń naqty júzege asyryla bastaýynyń dáleli», - dedi ol Qazaqstandaǵy saılaýǵa qatysty uıymdastyrylǵan dóńgelek ústel barysynda.
Onyń atap ótýinshe, saıası partııalar koronavırýs pandemııasy jaǵdaıynda jumystyń jańa formatyna tez beıimdelýge qabileti joǵary ekenin kórsetti. Іs-sharalardyń bir bóligi onlaın-rejımde ótip, kommýnıkatsııanyń barlyq zamanaýı arnalary qoldanyldy. Osylaısha, Qazaqstannyń qoǵamdyq-saıası kúntártibin qarqyndy ári progressıvti dep sıpattaýǵa bolady.
«Qazaqstannyń saıası júıesi zamanaýı talaptarǵa saı damyp keledi. Ortalyq saılaý komıssııasynyń qaýlysyna sáıkes, QR Parlamenti Májilisi men máslıhattar depýtattaryn saılaýǵa 10 halyqaralyq uıym men 31 shet memleketten 398 baıqaýshy akkredıtteldi. Aldaǵy parlamenttik jáne jergilikti saılaýlar jańa saıası maýsymdy ashady jáne eldiń saıası protsesterine serpin beredi. 7-shi shaqyrylǵan QR Parlamenti Májilisiniń jumysy bastalar aldynda Úkimet aýysady. Jańarǵan Parlamentke Memleket basshysy Qasym-Jomart Toqaev jarııa etken saıası jáne áleýmettik-ekonomıkalyq reformalardy odan ary júrgizý úshin zańnamalyq baza qalyptastyrý qajet bolady», - dedi Zarema Sháýkenova.
