Qazaqstannyń saýda saıasaty agressıvti bolýy tıis - Asqar Mamın
ASTANA. QazAqparat - Qazaqstannyń saýda saıasaty agressıvti bola túsýi tıis. Bul týraly búgin QR Indýstrııa jáne ınfraqurylymdyq damý mınıstrliginiń keńeıtilgen alqa májilisinde QR Premer-Mınıstriniń birinshi orynbasary Asqar Mamın aıtty, dep habarlaıdy QazAqparat tilshisi.
«Іshki jáne syrtqy saıasat sııaqty saýda saıasaty da birshama agressıvti ári proaktıvti bolýy qajet. Qazirdiń ózinde bos emes naryqtarmen básekege túsemiz. Taıaý jyldary kórshilerimizdiń qarqyndy damýy esebinen qalyptasatyn erkin eksporttyq keńistiktegi ósim barynsha shekteýli bolady», - dedi birinshi vıtse-premer.
Onyń aıtýynsha, bul baǵytta alǵashqy qadam jasaldy. «Qazaqstanyń ındýstrııany damytý ınstıtýty» AQ bazasynda shoǵyrlandyrylǵan ınstıtýt iske qosyldy. Onyń qyzmetiniń negizgi baǵyty mıkro jáne makro jaǵdaılarda eksporttyq saıasatty josparlaý jáne júzege asyrý bolady.
«Bul baǵyttaǵy munan arǵy jumys shetelde Qazaqstannyń eksporttyq saıasatyn ilgeriletý tetikteriniń aıasyn keńeıtý jáne tereńdetýge shoǵyrlanýy tıis», - dedi Asqar Mamın.
Buǵan deıin habarlaǵanymyzdaı, QR Indýstrııa jáne ınfraqurylymdyq damý mınıstri Jeńis Qasymbek 2019-2021 jyldary eksporttaýshylardy qoldaý sharalaryn kúsheıtý úshin 500 mlrd teńge jumsalatyndyǵyn aıtqan edi.
Atalǵan somanyń 470 mlrd teńgesi qarjylyq, al 30 mlrd teńgesi qarjylyq emes sharalardy quraıdy. Qarjylyq jáne servıstik sharalardy kúsheıtý ákimshilik jáne saýda kedergilerin eńserýge múmkindik beredi. Bızneske áleýetti satyp alýshyny tańdaýǵa, kólik shyǵyndaryn tómendetýge jol ashady.
