Qazaqstannyń saperlary oq-dárilerdi ýtılızatsııalaý mashyqtaryn jetildirip jatyr
El Prezıdenti Qasym-Jomart Toqaev Qorǵanys mınıstrligi basshylyǵyna ári qaraı saqtaýǵa qaýipti jáne paıdalanýǵa jaramsyz oq-dárilerdi joıý men olardy qaýipsiz saqtaýdy qamtamasyz etý sharalaryn iske asyrý jóninde birqatar tapsyrmalar berdi.
2021 jyly Memleket basshysy «Qaýipsiz el» ulttyq jobasyn bekitti. Sondaı-aq, «Qazaqstan Respýblıkasynyń qorǵanysy men Qarýly Kúshteri týraly» Zańǵa áskerı qoımalarda odan ári ustaý naqty qaýip tóndiretin oq-dáriler aınalymynyń normalaryna, erekshelikterine qatysty tolyqtyrýlar engizildi.
Zańnamadaǵy qabyldanǵan ózgerister qorǵanys vedomstvosyna óz betinshe jaramsyz oq-dárilerdi joıýmen aınalysýǵa múmkindik beredi. Bıyl kóktemde olardy kádege jaratý jumystary bastalady, olarǵa Qarýly Kúshterdiń ınjenerlik-saperlik bólimsheleri tartylatyn bolady.
Jıyn barysynda ınjenerlik áskerlerdiń ofıtserleri ınjenerlik, avıatsııalyq, artıllerııalyq oq-dárilerdiń negizgi túrlerin jáne olardyń erekshelikterin zerdeleý sabaqtaryn ótkizedi.
Tájirıbe sabaqtary «Jaǵalaý» oqý-jattyǵý polıgonynda ótedi. Arnaıy jabdyqtalǵan qalashyqta saperler jergilikti jerdi jarylys qaýpi bar qaldyqtardan tazartý, onyń ishinde olardy izdeý, tasymaldaý, zalalsyzdandyrý jáne joıý jóninde oqý tapsyrmalaryn pysyqtaıdy. Qaldyqtardy jarý jumystaryn uıymdastyryp, júrgizý kezindegi qaýipsizdik sharalaryna erekshe nazar aýdaryldy. Jumystar ınjenerlik qarý-jaraqtyń zamanaýı quraldaryn paıdalana otyryp júrgizilýde.
Teorııalyq jáne praktıkalyq synaqtardy tapsyrý arqyly jetkilikti bilim deńgeıin rastaı otyryp, jıynǵa qatysýshylar odan ári jumys isteýge ruqsat alady.
