Qazaqstannyń sanepıdbaqylaý qyzmeti merekelik is-sharalardy onlaın ótkizýdi usyndy

Bul týraly QazAqparat QR Úkimeti janyndaǵy Qazaqstanda koronavırýstyń taralýyna jol bermeý jónindegi vedomstvoaralyq komıssııanyń Telegram kanalyna silteme jasap habarlaıdy.

«Qurmetti qazaqstandyqtar!

Merekelik kúnderdiń jaqyndaǵanyn eskere otyryp, aldaǵy demalys kúnderin shaǵyn otbasylyq ortada ótkizýdi, adamdarmen tikeleı baılanystardy azaıtýdy, halyq kóp shoǵyrlanatyn is-sharalardy uıymdastyrmaýdy jáne olarǵa qatyspaýǵa shaqyramyn.

Barshańyzǵa belgili, elimizde epıdemıologııalyq ahýal turaqsyz. Álem elderinde vırýstyń taralýy sharyqtaý shegine jetip, pandemııa qurbandarynyń sany kún sanap artyp keledi. Medıtsına ǵalymdary da COVID-19 vırýsynyń mýtatsııalanǵan jańa shtamdarynyń juǵý qarqyny eki ese jyldam ekendigin jáne aýrýdyń aýyr ótetindigine áser etedi dabyl qaǵýda. Al adam kóp shoǵyrlanǵan ortada ınfektsııany juqtyrý qaýpi eselep artady. Sondyqtan biz barlyq merekelik is-sharalardy onlaın formatta nemese ózińizdiń otbasyńyzben úıińizde ótkizýdi usynamyz»,-deıdi resmı ókil.

Sondaı-aq ol koronavırýstyń jappaı taralýyn aýyzdyqtaýdyń utymdy joly bul saqtyq sharalaryn qatań saqtaý jáne vaktsınalaný ekendigine nazar aýdarady. Qazir óńirlerdiń basym kópshilgi «qyzyl» aımaqta. Soǵan qaraı oıyn-saýyq, saltanatty is-sharalardy uıymdastyrýǵa qatań tyıym salynǵan. Degenmen erejege enjarlyq tanytyp, karantın talaptaryn buzýshylar áli de azaımaı otyr.

«Qurmetti qazaqstandyqtar! Saqtyq sharalaryna salǵyrttyq tanytpaýǵa shaqyramyn. Bul jarqyn merekeni eń jaqyn adamdarmen bólisińiz, ózińizge qamqorlyq jasańyz jáne úıde bolyńyz!»,-deıdi sanıtarııalyq- epıdemıologııalyq baqylaý komıtetiniń ókili.