Qazaqstannyń saqtandyrý sektory álemdik ekonomıkalyq daǵdarysty sátti ıgerip otyr - «Eýrazııa» SK» AQ
ALMATY. 19 sáýir. QazAqparat - Saqtandyrý kompanııalary naryqtyq konıýnktýraǵa táýelsiz tabys tabýda. Bul týraly búgin Almatyda ótip jatqan táýekel menedjmenti jónindegi 8-halyqaralyq konferentsııada sóz boldy.
«Respýblıkanyń saqtandyrý sektoryndaǵy basty másele - halyqtyń saqtandyrýǵa jetkilikti deńgeıde mán bermeýi bolyp otyr. Óz úıin órtten nemese zilzaladan bank tarapynan májbúrleýsiz, erikti saqtandyrǵan adamdar úlesi óte az. Kóptegen postkeńestik elderdegi sııaqty Qazaqstan halqy da qandaı da bir aýqymdy tabıǵı nemese tehnogendik apat týyndaǵan jaǵdaıda memleket qoldaýyna senim artýǵa úırengen», - deıdi «Eýrazııa saqtandyrý kompanııasy» AQ-nyń Basqarma tóraǵasy Borıs Ýmanov. Onyń aıtýynsha, Qazaqstanda búginde jaqsy damyǵan bir ǵana saqtandyrý túri bar. Bul - avtomobıl ıesiniń mindetti azamattyq-quqyqtyq jaýapkershiligi. Ony engizgen sátte kólik ıeleri muny qosymsha salyq retinde qarastyrǵan bolatyn. Alaıda sońǵy jyldary bárimiz joldaǵy táýekelderdi basqarýdyń bul tásiliniń jumys isteıtinine kóz jetkizdik. Borıs Georgıevıch: «Keıde «Evrazııa» saqtandyrý kompanııasynyń Taılandtaǵy, Rýmynııadaǵy, AQSh-taǵy, Avstralııadaǵy, Túrkııadaǵy jáne Ońtústik Koreıadaǵy apattyq táýekelderdi basqarýǵa kómektesetinine, al otandastarymyzdyń burynǵysynsha negizinen Tótenshe jaǵdaılar mınıstrligine jáne Úkimet kómegine senim artyp otyrǵanyna qynjylamyn. Al qyrsyqqa tap bolǵanda saqtandyrý kompanııasyna baryp, aqsha alýdyń ornyna biz televızııany shaqyryp, ákimdikten kómek suraımyz. Bul máseleniń júıelik amalyn tabý qajettiligi týraly pikirtalas álsin-álsin týyndap turady. Biraq tez basylady. Alaıda, tabıǵı apattar men zilzalanyń oryn alý yqtımaldylyǵy túgesilmeıdi, bul elimizdiń jyl saıynǵy memlekettik bıýdjetinen kórinýde», - degendi aıtady.
Saqtandyrý kompanııasy basshysynyń sózine qaraǵanda, tabıǵı apat keltirgen materıaldyq zııandy óteý máselesin bir ǵana memleket sheshe almaıdy jáne sheshpeýi tıis. Saqtandyrýshy men saqtanýshy arasyndaǵy qarym-qatynas júıesi kóbine úkimet kómegin qajet etpeıdi. Bılik qyzmeti - ádil oıyn erejesin jasaý, klıent tarapynan alaıaqtyqtyń bolmaýyn jáne saqtandyrý kompanııalary tarapynan óz mindettemelerin naqty oryndaýdy qadaǵalaý. Qazaqstannyń saqtandyrý sektory tabıǵı jáne tehnogendik apattardan saqtandyrýdy senimdi qamtamasyz ete alatynyna onyń senimi mol.
