Qazaqstannyń saqtandyrý naryǵynda oń ózgerister qalyptasyp otyr - «Eýrazııa» saqtandyrý kompanııasy Basqarma tóraǵasynyń orynbasary
ALMATY. 21 jeltoqsan. QazAqparat /Erlik Erjanuly/ - Qazaqstannyń saqtandyrý naryǵyndaǵy oń ózgerister aldaǵy jyly da jalǵasady.
Bul jaıly búgin Almatydaǵy «Eýrazııa» saqtandyrý kompanııasy» AQ-nyń 2010 jyldyń aldyn ala qorytyndysyna arnalǵan baspasóz máslıhatynda sóz boldy.
"Qazaqstannyń saqtandyrý naryǵynda tikeleı saqtandyrý boıynsha syıaqy kólemi bıyl ótken jyldyń sáıkes kezeńimen salystyrǵanda 28 paıyzdaı ósti. 2011 jyly bul trend jalǵasady. Eń úlken saqtandyrý syıaqysy erikti jeke saqtandyrýdyń úlesine tıedi. Onda ósim 56 paıyzdan asyp otyr. Bul sektordaǵy ósimniń draıveri - erikti medıtsınalyq saqtandyrý. Al mindetti saqtandyrý 15 paıyzdy qurady», - deıdi «Eýrazııa» saqtandyrý kompanııasy» AQ-nyń Basqarma tóraǵasynyń orynbasary Nazym Týlchınskıı.
Onyń aıtýynsha, ósim múlikti erikti saqtandyrý salasynda da baıqalyp otyr. Onda bul kórsetkish 24 paıyzdy qurady. Bul jaǵymdy kórinis. Erikti jeke saqtandyrý naryqtyń eń mańyzdy kórsetkishi. Aınalym qarjysy shekteýli kásiporyndar men jeke tulǵalar úshin saqtandyrý alǵashqy qajettilikterdiń qataryna enbeıdi.
«Saqtandyrý naryǵy 2011 jyly senimdi túrde ósedi. Damý qarqyny saqtalady. Buǵan ekinshi deńgeıli bankterdiń naqty kredıtteýiniń ósýi óz yqpalyn tıgizedi. Sondaı-aq «Standart & Poor 's» halyqaralyq reıtıng agenttigi ótken aptada «Eýrazııa» saqtandyrý kompanııasynyń uzaqmerzimdik kredıttik reıtıngileri men qarjylyq turaqtylyǵyn «VV-» ten «VV» deńgeıge joǵarylatty. Kompanııanyń reıtıngi ulttyq baǵan boıynsha da «kzA» dan kzA» deńgeıge arttyryldy. Bul Qazaqstannyń makroekonomıkalyq táýekeldikteriniń tómendegeniniń aıǵaǵy», - deıdi Nazym Týlchınskıı.
