Qazaqstannyń saqtandyrý naryǵynda qańtar aıynda 52 paıyzdyq ósim baıqaldy
ALMATY. 14 naýryz. QazAqparat /Erlik Erjanuly/ - Elimizdiń saqtandyrý naryǵyndaǵy damý úrdisi jalǵasýda. "Sentras Inshýrans" saqtandyrý kompanııasy" AQ-nyń Basqarma tóraǵasy Talǵat Úsenov bul týraly búgin Almatyda ótken baspasóz máslıhatynda aıtty.
"Naryqta alǵashqy aıda qaıta qarjylandyrýdyń esebinen aıtarlyqtaı ósim boldy. 2010 jyly bastalǵan ósim jalǵasýda. Byltyr ol 16 paıyzdy quraǵan bolatyn. Jalpy qańtardaǵy ósimge asa tańdanýdyń qajeti joq. Óıtkeni, elimizdegi saqtandyrý naryǵy asa úlken emes. Oǵan birneshe iri kelisimsharttar aıtarlyqtaı yqpal etýi múmkin. Degenmen, 52 paıyz jetkilikti deńgeıde joǵary kórsetkish", - deıdi Talǵat Úsenov.
Onyń paıymdaýynsha, saqtandyrýdyń negizi sanattary naryqtyq jaǵdaıda. Máselen, avtokólik ıeleriniń mindetti saqtandyrýynda qańtarda ósim 14 paıyzdy qurap, jınaq 2 mıllıard teńgeden asty. Jumysshylardy baqytsyz jaǵdaıdan mindetti saqtandyrýdaǵy ósim 28 paıyz bolyp, 1 mıllıardqa jýyq teńgeni qurady. Al ózge mindetti saqtandyrý ónimderi túrlerindegi jınaq asa úlken emes.
T. Úsenovtyń aıtýynsha, jeke saqtandyrý blogynda: baqytsyz jaǵdaıdan saqtandyrýda ósim 154 paıyz bolyp, absolıýttik kórsetkishti - 790 mıllıon teńgeni qurady. Ol muny bankterdiń belsendiligimen baılanystyryp otyr. Sol sııaqty medıtsınalyq saqtandyrý - 24 paıyzǵa, ómirdi saqtandyrý - 83 paıyzǵa artqan. Múlikti saqtandyrý blogynda: avtokólikti saqtandyrý nóldik kórsetkishte bolyp, jınaq 286 mıllıon teńgeni qurady. Onda buǵan deıingi jyldardaǵy quldyraý toqtap, birtindep ósý úderisi bastaldy. Sondaı-aq júkti saqtandyrýdaǵy ósim 233 paıyz, múlikti saqtandyrýdaǵy ósim 2 eseden asyp otyr.
