Qazaqstannyń saqtandyrý naryǵynda biregeı jańa baǵdarlama paıda boldy
ALMATY. 14 naýryz. QazAqparat /Erlik Erjanuly/ - Naýryz aıynan bastap ortasha deńgeıdegi jol apattaryna baılanysty saqtandyrý tólemderin Jol polıtsııasynyń qujatynsyz-aq alýǵa múmkindik týyp otyr.
Bul týraly "Sentras Inshýrans" saqtandyrý kompanııasy" AQ-nyń Basqarýshy dırektory Rýslan Pogorelov búgin Almatyda ótkizgen baspasóz máslıhatynda aıtty.
"Kompanııa naýryz aıynan bastap "90h60h90" dep atalatyn biregeı jańa baǵdarlamany iske qosty. Ondaǵy eń basty másele - tólemderdi tóleý jyldamdyǵy men qarapaıymdylyǵy bolyp otyr. Kóligin saqtandyrǵan azamat óziniń kináli-kinásiz ekendigine qaramastan jáne Jol polıtsııasynyń qujatynsyz-aq tıisti tólemaqysyn ala alady. Ótemaqylar 3 banktik jumys kúni ishinde tólenedi", - deıdi Rýslan Pogorelov.
Jańa baǵdarlama aıasynda kompanııanyń 2010 jyly engizilgen "50h50" baǵdarlamasymen salystyrǵanda saqtandyrýshyǵa tólenetin ótemaqy kólemi 2 ese ulǵaıtylyp otyr. Sonymen qatar saqtandyrýdyń taǵy bir sanaty - baqytsyz jaǵdaılardan saqtandyrý máselesi de qarastyrylǵan. Osy arada "90h60h90" jobasynyń 3 baǵdarlamadan turatyn arnaıy paket ekenin de aıta ketken jón. Oǵan avtokólik ıesiniń azamattyq-quqyqtyq jaýapkershiligin erikti saqtandyrý, avtokassa jáne baqytsyz jaǵdaılardan saqtandyrý engizilgen.
R. Pogorelovtyń aıtýynsha, baǵdarlama sharty boıynsha - jol apaty kimniń kinásinen bolǵanyna qaramastan, saqtandyrylǵan azamattyń óz avtokóligine 90 myń teńge jáne júrgizýshiniń densaýlyǵyna zııan kelgen jaǵdaıda 60 myń teńge ótemaqy beriledi. Sondaı-aq jol apatyna qatysqan ekinshi kólik ıesine de, zardap shekken bolsa, 90 myń teńgege jýyq aqsha tólenedi. "Sentras Inshýrans" saqtandyrý kompanııasy" Basqarýshy dırektorynyń sózine qaraǵanda, ázirge bul baǵdarlama Almaty qalasynda ǵana júzege asyrylýda. Al aldaǵy ýaqytta búkil respýblıka aýmaǵyna taralatyn bolady.
