Qazaqstannyń saqtandyrý naryǵy birtindep tazaryp keledi - T. Úsenov
ALMATY. 14 naýryz. QazAqparat /Erlik Erjanuly/ - Saqtandyrý naryǵynda qańtar aıy kópten kompanııalar úshin shyǵyndy boldy.
Bul týraly "Sentras Inshýrans" saqtandyrý kompanııasy" AQ-nyń Basqarma tóraǵasy Talǵat Úsenov búgin Almatyda ótken baspasóz máslıhatynda aıtty.
«Kapıtaldy ulǵaıtý jónindegi QR Qarjy naryǵy men qarjy uıymdaryn retteý jáne qadaǵalaý agenttiginiń talaptarynyń qataıýyna baılanysty saqtandyrý naryǵy birtindep tazaryp keledi. Qańtar aıynan bastap sondaı-aq, saqtandyrý rezervi jónindegi zań kúshine endi. Osyǵan oraı saqtandyrý kompanııalarynyń saqtandyrý rezervi kúrt ósti. Sondaı-aq kóptegen kompanııalar úshin qańtar shyǵyndy boldy», - deıdi Talǵat Úsenov.
Onyń paıymdaýynsha, bıyl kompanııalardyń kapıtaly ulǵaıyp, oǵan qosymsha resýrstar tartylýda. Naryqtaǵy ótken jyldarda bastalǵan tazarý men shoǵyrlaný bıyl da, kelesi jyly odan ary jalǵaspaq. Máselen, sońǵy jyldary «Temir at», «NASKA», «Altyn-polıs», «Premer saqtandyrý» sııaqty kompanııalar óz qyzmetin toqtatty. Sonymen qatar «BTA Saqtandyrý», «BTA Zabota», «Atlanta-polıs» kompanııalary ózara shoǵyrlandy. Mundaı úrdis aldaǵy ýaqytta odan ary jalǵasa beretin bolady.
