Qazaqstannyń saqtandyrý naryǵy 2012 jyly 20,5 paıyzǵa ósti
ALMATY. 5 aqpan. QazAqparat - Saqtandyrý naryǵy 2012 jyly 175-den 211,5 mlrd. teńgege ulǵaıyp, ósim 20,5 paıyzdy qurady.
«Eýrazııa» saqtandyrý kompanııasy» AQ Basqarma tóraǵasynyń orynbasary Nazym Týlchınskıı búgin Almatyda ótken baspasóz máslıhatynda osylaı aıtty.
«Bul kórsetkish tek saqtandyrýshylar úshin ǵana mańyzdy emes. Saqtandyrý naryǵynyń jaǵdaıy el ekonomıkasyn sıpattaıdy. Eger adamda, kásipkerde ne kásiporynda saqtandyrýdy satyp alatyn qosymsha qarajat bolmasa onda onyń isi jaqsy júrip jatpaǵanyn kórsetedi», - deıdi N.Týlchınskıı. Onyń aıtýynsha, saqtandyrý uıymdarynyń jıyntyq aktıvi 2012 jyly 442,6 mlrd. teńgeni qurap, aldyńǵy jylmen salystyrǵanda 17 paıyzǵa artty. Otandyq saqtandyrý kompanııalarynyń jıyntyq jeke kapıtaly 7,6 paıyzǵa ulǵaıyp, 239,7 mlrd. teńgeni qurady.
Saqtandyrý jáne qaıta saqtandyrý syıaqysynyń ósimi 25,8 paıyzǵa artyp 237,1 mlrd. teńgege jetti.Al «Eýrazııa» saqtandyrý kompanııasy 11,4 paıyzdyq úlespen 27,1 mlrd. teńgeniń saqtandyrý syıaqylaryn jınap, óziniń kóshbasshylyq ornyn taǵy dáleldedi. Kompanııa respýblıkanyń saqtandyrý naryǵynda aktıvter, saqtandyrý rezervteri, jalpy jınaqtalǵan saqtandyrý syıaqy mólsheri, jeke kapıtal, jarǵylyq kapıtal, saqtandyrý tólemderi, netto-tólem men taza tabys mólsheri boıynsha birinshi oryndy ıelenýde.
