Qazaqstannyń respýblıkalyq mańyzy bar avtojoldarynda 11 elektrondyq tarazy ornatyldy
ASTANA. 16 qazan. QazAqparat - Qazaqstannyń 6 oblysynda júk kólikteriniń ruqsat etilgen salmaq parametrlerin saqtaýy 11 elektrondyq ólsheý júıesiniń kómegi arqyly baqylanady. Salmaq ólsheýdiń elektrondyq júıeleri kólikterdiń salmaǵy men bilikke túsken júktemesin avtomobılderdiń qozǵalys barysynda-aq baqylaýǵa múmkindik beredi. Jaqyn kúnderi mundaı elektrondyq salmaq ólsheý júıeleriniń sany 13-ke artady. Bul týraly QR Kólik jáne kommýnıkatsııa mınıstrliginiń baspasóz qyzmeti habarlady.
Qazirgi ýaqytta qondyrǵy sertıfıkattaýdan ótti jáne paıdalanýǵa berilýde.
Kóliktik baqylaý komıteti tóraǵasynyń orynbasary Áset Asaýbaevtyń aıtýynsha, «pılottyq joba aıasynda qoldanylǵan elektrondyq tarazylar qazirgi qoldanystaǵy kóliktik baqylaý beketteriniń qyzmetimen salystyrǵanda aıtarlyqtaı tıimdi ekenin dáleldedi. Birinshiden, kóliktik baqylaý qyzmetkerlerimen júrgizýshilerdiń tikeleı ózara júzdesýi bolmaıdy, bul sybaılas jemqorlyq kórinisterin joıýǵa septigin tıgizedi. Ekinshiden, elektrondyq tarazylar júrip ótken ár avtokólik quralyn tekserýge múmkindik beredi».
Aǵymdaǵy jyldyń qańtar aıynda pılottyq joba retinde qoldanysqa engizilgen salmaq ólsheýdiń 3 elektrondyq júıesiniń kómegimen 238 myńnan astam avtokólik tekserildi. Al, osy ýaqyt aralyǵynda barlyq statsıonarlyq beketter arqyly tekserilgen avtokólik quralynyń sany 74 592 quraǵanyn aıtyp ótý kerek.
Áset Asaýbaevtyń aqparatyna sáıkes, «kelesi jyly mundaı elektrondyq tarazylardyń sanyn 31-ge, al odan keıingi jyly 80-ge jetkizý josparda bar. Salmaq ólsheýdiń elektrondyq júıesiniń ornatylýyna baılanysty kólikterdi baqylaýdyń statsıonarlyq beketteri birtindep jabylatyn bolady».
Sondaı-aq, QR Kólik jáne kommýnıkatsııa mınıstriniń buıryǵymen aǵymdaǵy jyly kóliktik baqylaýdyń 4 statsıonarlyq beketi jabylǵanyn aıtyp ótken jón. Búgingi kúni mundaı 7 statsıonarlyq beket jumys isteıdi. Al, 2011 jyldyń qańtarynda olardyń sany 16 bolatyn.
Elektrondyq tarazylar ornatylǵan jol ýchaskelerinde jumys isteıtin kóliktik baqylaýdyń jyljymaly beketteriniń jumys prıntsıpteri de ózgeredi. Endigi jerde olar salmaq ólsheýdiń elektrondyq júıesi anyqtaǵan avtokólik quraldaryn ǵana toqtatyp, olarǵa aıyppul sala alady. Keler jyldyń qańtar aıynan bastap aıyppul salynǵany jónindegi eskertýler avtokólik quralynyń ıesine poshta arqyly da jiberiletin bolady.
Avtokólik quraldarynyń salmaq parametrlerin ólsheýdiń avtomattandyrylǵan júıesi elimizdiń joldaryn ýaqytynan buryn buzylýdan saqtaý, Kóliktik baqylaý komıtetiniń qyzmetin modernızatsııalaý jónindegi is-sharalar aıasynda baqylaý úrdisteriniń ashyqtyǵyn qamtamasyz etý jáne jetildirý maqsatynda qoldanysqa engizilip otyrǵanyn esterińizge salyp ótkimiz keledi.
Osyǵan uqsas salmaq ólsheý júıeleri Germanııa, Polsha, Lıtva, Ońtústik Koreıa jáne t.b. elderde qoldanylady.
