Qazaqstannyń Reseıdiń Qalýga oblysymen saýda aınalymy 180 mln dollardan asty
Bul týraly QazAqparat QR Syrtqy ister mınıstrliginiń baspasóz qyzmetine silteme jasap habarlaıdy.
«Vorsıno» júk qalashyǵynyń mýltımodaldyq kólik-logıstıkalyq ortalyǵynyń «Zapad» konteınerlik termınalynyń ashylý saltanatynda Elshi Kalýga turǵyndaryn tek oblys pen Reseı úshin ǵana emes, Eýrazııalyq ekonomıkalyq odaq elderi úshin de mańyzdy oqıǵamen quttyqtady. Ol óńirdiń kólik-logıstıkalyq ınfraqurylymyn damytýdaǵy tájirıbesin Qazaqstan úshin qyzyqty dep atady jáne kólik-logıstıkalyq ortalyǵy qazaqstandyq kásiporyndarmen jáne kólik toraptarymen yntymaqtastyq ornatatynyna úmit bildirdi.
E. Kósherbaev Qazaqstan men Reseıdiń tranzıttik múmkindikteri arqyly Eýropa men Ońtústik-Shyǵys Azııany baılanystyratyn «Batys Eýropa – Batys Qytaı» transqurlyqtyq kólik dáliziniń bóligi retinde Kalýga oblysynyń logıstıkalyq áleýetin keńeıtýdiń erekshe mańyzdylyǵyn atap ótti.
Іs-shara aıasynda otandyq dıplomat «Reseı poshtasynyń» Bas dırektory Maksım Akımovpen, sondaı-aq jańa konteınerlik termınal qurýdyń bastamashylary men ınvestorlarymen, «Delo» kompanııalar tobynyń prezıdenti Sergeı Shıshkarevpen, «Freıt Vılladj Kalýga Sever» JShQ dırektorlar keńesiniń tóraǵasy Petr Baskakovpen jáne «TransKonteıner» kompanııasynyń prezıdenti Aleksandr Isýrınmen kezdesti.
Kalýga oblysynyń gýbernatory Vladıslav Shapshamen ekijaqty kezdesý aıasynda taraptar saýda-ekonomıkalyq yntymaqtastyqtyń oń serpinin atap ótti. Qazaqstan 2020 jyldyń qorytyndysy boıynsha eksport kóleminen birinshi oryn alyp, Kalýga oblysynyń negizgi syrtqy saýda seriktesteriniń biri bolyp qala beredi. Sońǵy tórt jylda saýda 80%-ke ósti jáne 180 mıllıon dollardan asty, al pandemııanyń daǵdarys kezeńinde de saýda kólemi azaıǵan joq.
Qazaqstan Elshisi mıllıonnan astam adamnan turatyn halqy bar aımaq eldi kóptegen ónim túrlerimen qamtamasyz etetinin basa aıtyp, Kalýga oblysynyń óndiristik áleýetin joǵary baǵalady. Ol jergilikti bıliktiń ınvestıtsııalyq saıasaty joǵary halyqaralyq standarttarǵa sáıkes keletindigin jáne basqa elder úshin úlgi bola alatyndyǵyn atap ótti.
Taraptar ózara is-qımyldyń barlyq salasy boıynsha kóptegen máselelerdi talqylady.
Ekijaqty baılanystardyń áleýetin odan ary arttyrý úshin jaqsy múmkindikter bar ekeni atap ótildi.
Kezdesýge qatysýshylar ınvestorlyq qyzmet pen óndiristik kooperatsııany qosa alǵanda, eń mańyzdy baǵyttar boıynsha yntymaqtastyqty dáıekti túrde damytýǵa kelisti.
Sapar barysynda E. Kósherbaev «Vorsıno» ındýstrııalyq parkindegi «LAMINAMAM» jáne «Arhbým tıssıý grýpp» kompanııalarynyń zaýyttarynda, «Krıvskoe» AQ agroónerkásiptik kásipornynda jáne «ETNOMIR» park-mýzeıinde boldy.
