Qazaqstannyń Reseıdegi elshiliginiń qyzmetkerleri órtten zardap shekkenderge materıaldyq kómek kórsetedi
MÁSKEÝ. Tamyzdyń 4-i. QazAqparat /Narymbek Ysmaǵulov/ - Qazaqstannyń Reseı Federatsııasyndaǵy Elshiliginiń ujymy Reseıdegi basylmaı otyrǵan orman órtterinen zardap shekkenderge 500 myń teńge materıaldyq kómek aýdarý týraly sheshim qabyldady.
Elshiliktiń baspasóz qyzmetinen habarlaǵandaı, aqsha qarajaty dıplomatııalyq ókildik qyzmetkerleriniń jalaqy qory esebinen aýdarylmaq.
Esterińizge sala keteıik, orman órtteriniń saldarynan Reseıdiń jeti sýbektinde - tótenshe jaǵdaı rejimi, taǵy alty sýbektiniń aýmaǵynda jartylaı tótenshe jaǵdaı rejimi engizilip otyr. Qazirgi ýaqytta Reseı Federatsııasynyń 17 óńiriniń aýmaǵynda orman órtenip jatyr. Sońǵy málimetter boıynsha, órt shalǵan aýmaq 170 myń gektarǵa jetedi. Qurban bolǵan adamdardyń sany 40-qa jetti, úsh myńnan astam adam baspanasyz qaldy.
Búginde Máskeýde orman órtteriniń saldarynan zardap shekken halyqqa qaıyrymdylyq kómek jınaıtyn 12 statsıonarlyq qosyn jumys isteýde, barlyq óńirde kómekke aqsha jınaý úshin qaıyrymdylyq esepshottary ashylyp otyr.
Reseı Prezıdenti dúısenbi kúni jasaǵan beınemálimdemesinde el azamattaryn kómekke shaqyrdy. «Apatqa ushyraǵandarǵa kómek qolyn sozaıyq», - dedi D.Medvedev óz úndeýinde.
