Qazaqstannyń Reseı arqyly ótetin tranzıttik poıyzdarynan jolaýshylardyń túsip qalý múmkin emes - Asaýbaev
ASTANA. QazAqparat - Qazaqstannyń Reseı arqyly ótetin tranzıttik poıyzdarynan jolaýshylardyń túsip qalý múmkin emes. Bul týraly búgin QR Investıtsııalar jáne damý mınıstrligi Kólik komıtetiniń tóraǵasy Áset Asaýbaev málim etti, dep habarlaıdy QazAqparat.
Aıta keteıik, búgin QR Parlamenti Senatynyń Ekonomıkalyq saıasat, ınnovatsııalyq damý jáne kásipkerlik komıtetiniń otyrysynda «1996 jylǵy 18 qazandaǵy Qazaqstan Respýblıkasynyń Úkimeti men Reseı Federatsııasynyń Úkimeti arasyndaǵy temirjol kóligi kásiporyndarynyń, mekemeleri men uıymdarynyń qyzmetin quqyqtyq retteýdiń erekshelikteri týraly kelisimge ózgerister engizý týraly hattamany ratıfıkatsııalaý týraly» zań jobasy qaralǵan bolatyn. Otyrystan keıin BAQ ókilderi Áset Asaýbaevtan Qazaqstannyń tranzıttik poıyzy Reseı aýmaǵy arqyly ótip bara jatqanda odan jolaýshylardyń túsip qalýy múmkin be dep suraǵan edi.
«Mundaı oqıǵany boldyrmaý úshin tasymaldaýshyǵa jaýapkershilik júktelgen. Ózderińiz de biletindeı, depýtattardyń bastamashylyq etýimen buǵan deıin parlamentte kólik máseleleri jónindegi zań jobasy qabyldanǵan bolatyn. Onda «basqa oryndar» degen túsinik engizilgen. Sonymen qatar basqa oryndar arqyly ótkende baqylaý júzege asyrylatyn ýchaskelerde poıyzdardyń ótý jaýapkershiligi tasymaldaýshyǵa júktelgen. Osyǵan oraı mundaı oqıǵany boldyrmaý mindeti tasymaldaýshyǵa júkteledi. Buǵan qosa, shekara arqyly júrdek poıyzdar ótedi. Al olardyń esikteri qozǵalys barysynda ashylmaıdy»,- dedi Asaýbaev.
Al komıtet otyrysynda negizgi baıandama jasaǵan Investıtsııalar jáne damý vıtse-mınıstri Roman Sklıar óz sózinde hattamamen ózge eldiń aýmaǵynda ornalasqan bir eldiń temirjol ýchaskesinde júk operatsııalaryn júrgizý úshin stansalardy ashý jáne jabý tártibi reglamentteletindigin, shekaralyq aımaqtardaǵy jolaýshylar tasymalyn uıymdastyrý máseleleri qarastyrylǵanyn atap ótti.
Senatorlar zań jobasyn talqylaǵannan keıin ony palatanyń jalpy otyrysyna shyǵarý týraly sheshim qabyldady.
