Qazaqstannyń pikirsaıys federatsııasy debatqa arnalǵan mobıldi qosymsha qurdy
Atalǵan uıym «Jas Otan» Jastar qanatynyń qoldaýymen qurylǵan. Elimizdegi pikirsaıys qozǵalysyn jandandyrýǵa, barlyq pikirsaıys uıymdaryn biriktirýge, týrnırlerdi uıymdastyrýǵa, halyqaralyq jarystarǵa qatysý úshin jas debaterlerdi daıyndaýǵa baǵyttalǵan.
«Qazaq halqy árdaıym aqyndarǵa, jyrshy-termeshilerge, baı bolǵan. Óskeleń urpaqtyn qanynda da bul óner bar. Pikirsaıys bul tek sóz túsindirý, sóz talastyrý ǵana emes, ómirlik joldy tańdaýǵa úlken járdem beretin mektep. Menińshe, bul federatsııa bolashaqta kóptegen jastarǵa ómirlik jolyn taýyp, kásibı maman retinde qalyptasýyna kómektesedi», - dedi «Qazaqstan Pikirsaıys Federatsııasy» RQB Prezıdenti Bolat Buharbaı Ortalyq kommýnıkatsııalar qyzmetinde ótken baspasóz máslıhatynda.
Brıfıng aıasynda pikirsaıysshylardyń kommýnıkatsııasyna arnalǵan saıt jáne mobıldi qosymsha tanystyryldy. «Time to debate» qosymshasynyń ereksheligi – ýaqyt ólsheıtin taımkıper fýnktsııasyn atqarýy.
Sonymen birge, brıfıngte «Jastar Alany 2019» respýblıkalyq pikirsaıys týrnıriniń nátıjesi jarııalandy. «Úzdik pikirsaıysshy» ataǵy úshin 18-29 jas aralyǵyndaǵy 120-dan astam jas sóz sheberleri baq synasty.
«Bıyl biz Aqparat jáne qoǵamdyq damý mınıstrliginiń qoldaýymen, «Azamattyq bastamalardy qoldaý ortalyǵy» KEAQ birlesip, «Jastar Alany 2019» respýblıkalyq pikirsaıys týrnırin ótkizdik. Bul oqıǵa eldiń pikirsaıys qaýymdastyǵy arasynda erekshe qyzyǵýshylyq týdyrdy. Alǵashynda 133 fraktsııadan ótinim tústi. Komıssııa sheshimimen 60 fraktsııa bizdiń týrnırdiń fınalyna qatysty. Sondaı-aq, týrnır aıasynda oıynshylar men tóreshilerge turaqty túrde semınar men trenıngter ótkizdik. Olardyń qorytyndysy boıynsha qatysýshylar sertıfıkattar alyp, osyndaı trenıngterdi óz óńirinde ótkizýge múmkindik aldy», - dedi «Jas Otan» Jastar qanatynyń tóraǵasy Dáýlet Káribek.
