Qazaqstannyń penıtentsıarlyq mekemelerinde Rojdestvoǵa oraı arnaıy is-sharalar ótedi
ASTANA. QazAqparat - Erteń Qazaqstannyń penıtentsıarlyq júıesi mekemelerinde Rojdestvo merekesine qatysty is-sharalar ótedi, dep habarlady ІІM Qylmystyq-atqarý júıesiniń respýblıkalyq vedomstvosynda.
«Bas bostandyǵynan aıyrý oryndarynda din tutý erkindigine adam quqyqtaryn saqtaý aıasynda Rojdestvo, Qurban aıt merekeleri qarsańynda turaqty túrde sharalar uıymdastyrylady», dedi QAJ komıtetinde jazasyn óteýshiler arasynda tárbıe jáne áleýmettik-psıhologııalyq jumystar basqarmasynyń bastyǵy Marat Talasbaev.
ES-164/3 (Petropavl q. jalpy rejim) mekemesine Petropavl qalasy Voznesensk Kafederaldyq Soborynyń ókili barady. Ol jazasyn óteýshilerdi Rojdestvomen quttyqtaıdy. Kezdesý aıasynda merekelik túski as uıymdastyrylmaq. Qaraǵandy oblysynyń mekemelerinde dinı qyzmetshiler merekelik qulshylyq etý rásimin ótkizip, beıbitshilik pen kelisim jaıly dáris oqıdy, jazasyn óteýshilerdi adamdar arasyndaǵy dostyqty nyǵaıtýǵa, jaqyndaryna qamqorlyq pen meıirimdilik tanytýǵa úndeıdi. OV-156/3 (Óskemen q. jalpy rejim) arnaıy kontıngentti mekemesinde shirkeý ókili «Rojdestvo-Hrıstovo» taqyrybynda dáris oqıdy», - dedi M. Talasbaev.
