Qazaqstannyń paravoleıbolshylary álem chempıonatyna qatysyp jatyr
Qazaqstan paravoleıbol federatsııasynyń prezıdenti Dúısenbaı Turǵanovtyń aıtýynsha, voleıboldy otyryp oınaıtyn el quramasy Bosnııa men Gertsegovına astanasy – Saraevo qalasyndaǵy álem chempıonatynda baq synaýda.
Álem chempıonaty 4 qarashada bastalǵan. Oǵan álemniń 16 eliniń komandalary qatysyp jatyr.
«Qazaqstannyń 11 dúrkin chempıony atanǵan paravoleıbol komandasy Atyraý, Qyzylorda jáne Mańǵystaý oblysynyń sportshylarynan quralǵan. El quramasy Azııa oıyndarynda ІІІ oryndy, Azııa chempıonatynda ІІ jáne ІІІ oryndy ıelengen. Qazir álemdik reıtıngte eń myqty komandalardyń alǵashqy segizdigine enip otyr. Álem chempıonatynyń V tobynda Horvatııa, Iran, Irak komandalarymen úsh oıyn ótkizdi. Aldymen Horvatııa quramasyn 3:0 esebimen utty. Odan keıin Iran Islam Respýblıkasynyń komandasyna ese jiberdi. Úshinshi oıynda Irak eliniń komandasynan 3:0 esebimen basym tústi», -dep habarlady Dúısenbaı Turǵanov.
Onyń aıtýyna qaraǵanda, kelesi jyly Astanada paravoleıboldan Azııa chempıonaty ótedi.
«Saraevoda halyqaralyq paravoleıbol federatsııasynyń prezıdenti Barrı Kýznermen, Azııa jáne Okeanııa paravoleıbol federatsııasynyń damý jónindegi dırektory Veı Pın Týmen kezdesip, Astanada paravoleıboldan Azııa chempıonatyn ótkizý máselesin talqyladyq. Qurlyqtyq chempıonat 2023 jylǵy maýsym aıynyń sońy men shilde aıynyń basynda ótedi. Kelissózderdiń nátıjesi halyqaralyq paravoleıbol federatsııasy atqarý komıtetiniń tıisti sheshimimen bekitiledi. Inspektorlar Qazaqstanǵa kelesi jyldyń basynda keledi», -dep málim etti Dúısenbaı Turǵanov.
Endi qazaqstandyq paravoleıbolshylar Serbııa Respýblıkasynyń komandasymen kezdesedi. Álem chempıonaty 11 qarashaǵa deıin jalǵasady.
Eske sala ketelik, budan buryn 15 jasar atyrýlyq sportshy djıý-djıtsýdan álem chempıony atanǵanyn jazǵan edik.